For the second half of your life...

အခုဒီစာစုဟာ ကျွန်တော့်ရဲ့  အစ်မတစ်ယောက်လို ရင်းနှီးချစ်ခင်လေးစားရတဲ့ မသစ္စာအလင်း (http://www.thitsaralin.org) (http://www.facebook.com/thanthan.sein) ရဲ့  ဇူလိုင်လ (၂၀)ရက်နေ့မှာ ကျရောက်မယ့် အနှစ် ငါးဆယ်ပြည့် ရွှေရတုမွေးနေ့အထိမ်းအမှတ်အတွက် မွေးနေ့လက်ဆောင်အဖြစ် အမှတ်တရ ရေးသားထားတာဖြစ်ပါကြောင်းခင်ဗျား......

*******************************************************

အမရေ

ဒီရက်ပိုင်းထဲ စိတ်ကူးပေါ်လာတာနှင့် ကျောင်းတက်တုန်းက Class Work အတွက် ဖတ်ခဲ့ရတဲ့ စာအုပ်တစ်အုပ်ကို အွန်လိုင်းမှာ ပြန်ရှာဖတ်ဖြစ်တယ်။ စာအုပ်ရေးတဲ့သူက ၂၀၀၅ ခုနှစ်မှာ အသက် (၉၆) နှစ်အရွယ်နှင့် ကွယ်လွန်သွားခဲ့ပြီဖြစ်တဲ့ ကမ္ဘာကျော်စီမံခန့်ခွဲမှုဘာသာရပ်ပညာရှင် Peter Drucker ရဲ့  Management Challenges for the 21st Century ဆိုတဲ့ စာအုပ်ပါ။ အဲဒီစာအုပ်ကို ၁၉၉၉ ခုနှစ်မှာ သူရေးပြီး ထုတ်ဝေခဲ့တာ ဆိုတော့ အဲဒီအချိန် သူ့အသက် ၉၀ လောက်တော့ ရှိပြီပေါ့။ စာအုပ်မှာ အခန်းကြီး (၆)ခန်းပါတယ်။ ဟိုးအရင်စဖတ်တုန်းကတည်းက ကျွန်တော်က နောက်ဆုံးအခန်းဖြစ်တဲ့ အခန်း (၆) ကို စိတ်ဝင်တစားဖတ်ဖြစ်ခဲ့တာ။ အခုတစ်ခါ ပြန်ဖတ်တော့လည်း အဲဒီအခန်းကိုပဲ တန်းပြီး ဖတ်မိပြန်တယ်။ အခန်း (၆) ရဲ့  ခေါင်းစဉ်က Managing Oneself တဲ့။ အဲဒီ Chapter မှာ ထပ်ပြီး ခေါင်းစဉ်ငယ်လေး (၇) ခုနှင့် ဆွေးနွေးသုံးသပ်ထားပါတယ်။ အဲဒီခေါင်းစဉ်ငယ်လေးတွေထဲက တစ်ခုကို ဖတ်ရင်းက အစ်မမွေးနေ့ကို သတိရသွားပြီး ဒီနှစ် အစ်မအတွက် မွေးနေ့လက်ဆောင်ကို ဒီခေါင်းစဉ်ထဲကအကြောင်း ပြန်ပြောပြရင်း ပို့စ်တစ်ပုဒ်ရေးဖို့ ဆုံးဖြတ်လိုက်ပါတယ်။ အဲဒီခေါင်းစဉ်ငယ်လေးက The Second Half Of Your Life တဲ့ အမရေ။

Peter Drucker က ခေါင်းစဉ်ငယ် စစချင်းမှာ What to do with the second half of one's life?ဆိုတာလေးနှင့် မေးခွန်းမေးထားတယ်။ လူတွေဟာ အလုပ်တစ်ခုမှာ တောက်လျှောက် အနှစ် နှစ်ဆယ်ကျော်၊ သုံးဆယ်လောက် လုပ်လာကြပြီးတဲ့အချိန်မှာ သူတို့တွေဟာ သူတို့လုပ်နေရတဲ့ အလုပ်တွေအပေါ်မှာ ငြီးငွေ့လာတတ်ကြတယ်။ အလုပ်အပေါ်ထားတဲ့ သူတို့ရဲ့ သဘောထားအမြင်တွေ ပြောင်းလာတတ်ကြတယ်။ အလုပ်က သူတို့အတွက် စိန်ခေါ်မှုမရှိတော့ဘူးလို့ ခံစားလာကြရတယ်။ ဒါကြောင့် အသက်လေးဆယ်ပတ်ချာလည်မှာ လူပြောများကြတဲ့ "Mid-Life Crisis" ဆိုတဲ့ ပြဿနာကို တော်တော်များများခံစားကြရပါတယ်တဲ့။ လက်ရှိသူတို့လုပ်နေရတဲ့အလုပ်တွေမှာ ဘယ်လောက်ပဲ ကျွမ်းကျွမ်းကျင်ကျင်လုပ်နိုင်နေပါစေ၊ အဲဒီအလုပ်နှင့်ပတ်သက်ပြီး လေ့လာသင်ယူမှု (Learning) အသစ်တွေလည်း မလုပ်နိုင်တော့သလို၊ မိမိအလုပ်နှင့်ပတ်သက်ပြီး Contribution တွေလည်း လုပ်နိုင်ဖို့ အားနည်းသွားပါတယ်တဲ့။

ဒီနေရာမှာ ကိုယ်ကာယကို ဦးစားပေးပြီး အလုပ်လုပ်ကြရတဲ့ သူတွေအနေနှင့်ဆိုရင် အဲဒီလောက် နှစ်တွေအများကြီးအလုပ်လုပ်ပြီးသွားချိန်မှာ သူတို့ရဲ့  ခန္ဓာကိုယ်ရော၊ စိတ်ရောဟာ အင်မတန် ပင်ပန်းနွမ်းနယ်သွားကြပြီဖြစ်လို့ နောက်ကျန်သေးတဲ့ သူတို့ရဲ့ ဘ၀သက်တမ်းကို နှစ်ပြည့် ဆက်ပြီးနေထိုင်ရအုံးမယ်ဆိုရင်တောင်မှ သိပ်ပြီး မယ်မယ်ရရ မလုပ်နိုင်ကြတော့ပါဘူးတဲ့။ ပေါ့ပေါ့ပါးပါးပဲ ဘ၀ကို ရှင်သန်နေထိုင်ပြီး အချိန်တွေကို ကုန်ဆုံးပစ်လိုက်ကြတာ များပါတယ်တဲ့။

ဒါပေမယ့် အသိဉာဏ်ကို အခြေပြုပြီး အလုပ်လုပ်ကြရတဲ့သူတွေ (Knowledge Workers) အနေနှင့်ကတော့ အသက်သုံးဆယ်လောက်က သူတို့အတွက် စိန်ခေါ်မှုတွေအဖြစ်သတ်မှတ်ခဲ့တဲ့အလုပ်တွေဟာ သူတို့အသက်ငါးဆယ်လောက်မှာ သေချင်လောက်အောင်ပျင်းရတဲ့ကိစ္စတွေဖြစ်သွားပေမယ့်လည်း သူတို့မှာ ကိုယ်ရော၊ စိတ်မှာပါ စွမ်းဆောင်နိုင်စွမ်းတွေက ဆက်ပြီးကျန်နေပါသေးတယ်။ ဒါကြောင့်မို့ ဒီလို အသိဉာဏ်အခြေပြုပြီး အလုပ်လုပ်နေတဲ့သူတွေအနေနှင့် သူတို့ရဲ့  ကျန်နေတဲ့သက်တမ်းတစ်ဝက်ကို ဘယ်လိုဖြတ်သန်းကျော်လွန်မယ်ဆိုတာကို ကြိုတင်ပြင်ဆင်ထားဖို့ အရေးတကြီးလိုအပ်ပါတယ်လို့ စာရေးသူက ဆိုပါတယ် အစ်မရေ။

ဒီနေရာမှာ သူက အဖြေ (၃) ခုကို ရွေးထုတ်ပြီး ဆွေးနွေးထားပါတယ်။

နံပါတ် (၁) က Career အသစ်တစ်ခုနှင့် ဘ၀ကို ပြန်စပါ တဲ့။ လက်ရှိလုပ်နေတဲ့အလုပ်နှင့် သဘာဝချင်းမတူ၊ ပတ်ဝန်းကျင်ချင်းမတူတဲ့ အခြားအလုပ်ပုံစံအသစ်တစ်မျိုးကို ပြောင်းလုပ်ဖို့ တိုက်တွန်းထားတာပါ။ ဥပမာ- အရင်က အစိုးရ၀န်ထမ်းလုပ်နေတဲ့သူက ကိုယ်ပိုင်အလုပ်တစ်ခုပြောင်းလုပ်တာမျိုး၊ အရင်က ပန်းချီဆွဲနေတဲ့ပန်းချီဆရာက စာရေးဆရာ ပြောင်းလုပ်တာမျိုး။ အဲလိုမျိုး ပြောင်းလုပ်ကြည့်ပါတဲ့။

နံပါတ် (၂) က Parallel Career ကို ပြိုးထောင်ယူပါလို့ ပြောပါတယ်။ အခုလက်ရှိ အချိန်ပြည့်လုပ်နေတဲ့ မိမိအလုပ်ကနေ အချိန်ကို လျှော့ချလိုက်ပြီး တခြား မိမိစိတ်ဝင်စားတဲ့၊ လုပ်ချင်တဲ့ Career အသစ်တစ်ခုအတွက် အချိန်ပေးလိုက်တာမျိုးပါ။ ဒီပုံစံကို တော်တော်များများလုပ်ကြတယ်၊ အောင်မြင်မှုလည်း ရကြတယ်လို့ စာရေးသူကပြောထားပါတယ်။ ဒီနံပါတ်(၂) အဖြေနှင့်ပတ်သက်ပြီး ကျွန်တော်သတိထားမိတာတော့ အခုနောက်ပိုင်း နိုင်ငံခြားက Celebrity တွေ အဲဒါမျိုးတွေလုပ်နေကြတာများလာတယ်။ သူတို့လုပ်နေတဲ့ အနုပညာလုပ်ငန်းကိုလည်း အရှိန်မပျက်ဆက်လုပ်ရင်းက တခြားအချိန်တွေမှာ လူမှုရေးလုပ်ငန်းတွေမှာ တက်တက်ကြွကြွပါဝင်လှုပ်ရှားလာကြတယ်။ ထင်သာမြင်သာတွေထဲကဆိုရင် ဟိုတစ်ပတ်လောက်ကမှ မြန်မာပြည်လာလည်သွားတဲ့ Jackie Chan တို့၊ မင်းသမီး Angelina Jolie တို့၊ U2 အဖွဲ့က Bono တို့ဆို သူတို့လုပ်နေတာတွေက ဒီလမ်းကြောင်းထဲ ၀င်နေတာကို ထင်ထင်ရှားရှားတွေ့ရတယ် အစ်မရေ။ နောက် အဆိုတော် Celine Dion ကျတော့ လူမှုရေးလုပ်ငန်းတွေလည်း လုပ်နေသလို၊ အခြားတစ်ဘက်မှာလည်း Perfume ကုမ္ပဏီကိုပါ တည်ထောင်ထားသေးတယ်။ ဒီလိုပုံစံမျိုး လုပ်နေကြတဲ့သူတွေကို ကျွန်တော်တို့ ပတ်ဝန်းကျင်မှာလည်း တော်တော်လေး မြင်ဖူး၊ ကြားဖူးနေတာပါပဲ။ ပင်မ မိမိလုပ်နေတဲ့ အလုပ်ကိုလည်း အရှိန်မပျက်လုပ်ရင်း၊ တခြားကိုယ်ဝါသနာပါတဲ့အလုပ်ကိုပါ တပြိုင်တည်း လုပ်သွားကြတာမျိုးပေါ့။

နံပါတ် (၃) ကတော့ Social Entrepreneurs အဖြစ် ရပ်တည်နေထိုင်သွားပါတဲ့။ လက်ရှိလုပ်နေတဲ့အလုပ်မှာ အဆင်ပြေနေ၊ အောင်မြင်နေပေမယ့်လည်း အဲဒီအလုပ်ကနေ မိမိရဲ့  အချိန်တွေကို တစ်စ တစ်စ လျှော့ရင်း အခြားတစ်ဘက်မှာ အကျိုးအမြတ်မမျှော်ကိုးတဲ့ Non Profit အလုပ်တွေကို တိုးတိုးလုပ်သွားပြီး နောက်ဆုံးမှာ မိမိရဲ့ မူရင်းအလုပ်ကို လုံးဝစွန့်လွှတ်လိုက်တာမျိုးလို့ စာရေးသူကပြောထားတာပါ။ နံပါတ်(၃) ပုံစံမျိုးနှင့် ဒီဆယ်စုနှစ်တွေအတွင်းမှာ ထင်ထင်ရှားရှားနှင့် ကျွန်တော်ခေါင်းထဲ တန်းပေါ်လာတဲ့သူကတော့ Bill Gates ပါပဲ။ သူလုပ်သွားတဲ့လမ်းကြောင်းက ဒီပုံစံမျိုးဖြစ်နေတာ သတိထားမိတယ်။ အခုအချိန်မှာ သူဟာ သူတည်ထောင်ခဲ့တဲ့ Microsoft မှာ Non-executive Chairman ဆိုတဲ့ နေရာကိုပဲယူထားပြီး လက်ရှိမှာ သူတကယ်လုပ်နေတာတော့ တစ်ကမ္ဘာလုံးမှာရှိတဲ့ လိုအပ်တဲ့ ကျန်းမာရေး၊ ပညာရေးကဏ္ဍတွေမှာ သူပိုင်ငွေတွေလိုက်လှူတယ်၊ တခြားသူဋ္ဌေးတွေကိုလည်း လှူအောင် လိုက်တိုက်တွန်းပေးတယ်။ Philanthropist တစ်ယောက်အဖြစ် ဆက်လက်ရပ်တည်နေပါတယ်။ မြန်မာပြည်မှာဆိုရင်တော့ ကိုကျော်သူနှင့်မရွှေဇီးကွက်တို့လိုမျိုး လို့ ပြောလို့ရမယ်ထင်တယ်။

ပီတာဒရပ်ကာကြီးက ဆက်ပြောထားတာတော့ ကျန်နေတဲ့သက်တမ်းတစ်ဝက်ကို ကိုယ်လိုချင်တဲ့ပုံစံအတိုင်းဝင်အောင် စီမံခန့်ခွဲနိုင်တဲ့သူတွေက လူနည်းစုပါပဲတဲ့။ ကျန်တဲ့လူအများစုကတော့ လက်ရှိလုပ်နေတဲ့အလုပ်ကိုပဲ ဆက်လုပ်ရင်း၊ ပျင်းပျင်းရိရိနှင့် ဘ၀ကိုဖြတ်သန်းရင်း၊ ပင်စင်ယူရမယ့်နေ့ (အနားရမယ့်နေ့)ကို ထိုင်မျှော်ရင်း အချိန်တွေကို ကုန်ဆုံးပစ်လိုက်ကြပါတယ်တဲ့။ လူနည်းစုဖြစ်တဲ့ သက်တမ်းတစ်ဝက်ကို စီမံခန့်ခွဲနိုင်တဲ့သူတွေကတော့ သူတို့ရဲ့  ကျန်နေတဲ့ ဘ၀သက်တမ်းကို မိမိအတွက်နှင့် လူ့ပတ်ဝန်းကျင်အသိုင်းအ၀ိုင်းအတွက် အခွင့်အလမ်းတစ်ရပ်အဖြစ် မြင်ထားကြတဲ့သူတွေပါပဲတဲ့။ ဒီလို ကျန်တဲ့သက်တမ်းတစ်ဝက်ကို စီမံခန့်ခွဲနိုင်ဖို့အတွက် လူတိုင်းဟာ သက်တမ်းတစ်ဝက်မရောက်ခင်ကတည်းက ကြိုတင်စီမံကိန်းချပြီး ပြင်ဆင်ထားသင့်တယ်လို့ အကြံပေးထားပါတယ်။

အထူးသဖြင့် မိမိလက်ရှိလုပ်နေတဲ့ လုပ်လက်စအလုပ် အောင်မြင်နေတုန်းအချိန်မှာကတည်းက ဒုတိယသက်တမ်းတစ်ဝက်ကို ဘယ်ပုံအသုံးချမယ်ဆိုတာ ကြိုပြင်ထားသင့်ပြီလို့ သတိပေးထားပါတယ်။ ဖြစ်နိုင်ရင် အသက်သုံးဆယ်ကျော်အရွယ်လောက်ကတည်းက ပြင်ထားပါလို့ဆိုပါတယ်။ တကယ်လို့ အခုလက်ရှိအချိန်မှာ မိမိအနေနှင့် နောင်ကျန်နေတဲ့ သက်တမ်းအတွက် ဆက်လုပ်ဖို့ လုပ်ချင်တာ တစ်ခုခု (သို့) ၀ါသနာပါတာတစ်ခုခုမရှိသေးဘူးဆိုရင် အခုအချိန်ကတည်းက စောစောစီးစီး ၀ါသနာတစ်ခုခုကို မဖြစ်မနေ ပြုစုပျိုးထောင်ထားသင့်ကြောင်း ထပ်လောင်းလို့ တိုက်တွန်းထားပါတယ်။

နှစ်ပေါင်း (၉၀)ကျော် ဘ၀ကို အောင်အောင်မြင်မြင်နှင့်ဖြတ်သန်းလာခဲ့ပြီးတဲ့ ကမ္ဘာကျော်စီမံခန့်ခွဲမှုပညာရှင်တစ်ယောက်ရဲ့  ၂၁ရာစုမှာ ရှင်သန်ကျန်ရှိခဲ့မယ့် လူသားတွေအတွက် အကြံပေးချက်တွေပါပဲ အမရေ။ သူကတော့ လောကီဘက်ကနေပြီး လူသားတစ်ယောက်အတွက် အကောင်းဆုံးဘ၀ကို အသုံးချနိုင်မယ့် ပုံစံတွေကို စဉ်းစားပြီး ပြောပြသွားခဲ့တာပါပဲ။

ဒီနေရာမှာ သူက Knowledge Workers တွေရဲ့  ဘ၀အခြေအနေကို ယေဘူယျခြုံကြည့်ပြီး ပြောသွားခဲ့တာပါ။ ကျွန်တော်တို့ဖြည့်စဉ်းစားဖို့လိုတာက ကျွန်တော်တို့နိုင်ငံရဲ့  စီးပွားရေးစနစ်၊ နိုင်ငံရေးစနစ်၊ လူမှုရေးစနစ်အနေအထားတွေနှင့်၊ ကျွန်တော်တို့ရဲ့  လက်ရှိအခြေအနေ ဘ၀ရပ်တည်နေမှုတွေနှင့် ဒီအဖြေသုံးမျိုးထဲက တစ်ခုခုကို ရွေးချယ်အသုံးချကြည့်မယ်ဆိုရင် ဖြစ်နိုင်မလားဆိုတာမျိုးပါ။ နောက်ထပ်ဖြည့်ပြီး စဉ်းစားရမယ့် အချက်တွေမှာ မိမိ မိသားစုရဲ့  စားဝတ်နေရေးက အဆင်ပြေပြေ ရပ်တည်နိုင်တဲ့ အနေအထားရှိနေပြီလား၊ ကိုယ်ကြည့်ရှုထောက်ပံ့ရမယ့် သားသမီးတွေ၊  မိဘဆွေမျိုးသားချင်းတွေကရော လက်လွှတ်လို့ရတဲ့ အခြေအနေရောက်ပြီလား၊ ကိုယ်တိုင်ရဲ့  ကျန်းမာရေးအခြေအနေကရော ကောင်းမွန်နေတုန်းလား စတဲ့ တခြားအချက်လေးတွေလည်း ပါပါမယ်။ ဒီအခြေအနေတွေအားလုံးကို ခြုံငုံသုံးသပ်ကြည့်ပြီးမှ ဘယ်လို ဘယ်ပုံ ကူးပြောင်းနိုင်မလဲ ဆက်စဉ်းစားရမယ်လို့ ထင်ပါတယ်။

နောက်တစ်ခုအနေနှင့် ထပ်ဖြည့်ပြောရအုံးမယ်ဆိုရင် ကျွန်တော်တို့က ဘာသာရေးရှုထောင့်ကပါ စဉ်းစားလိုက်တဲ့အခါကျတော့ Career ကို ပြောင်းတဲ့အခါမှာ လောကီကိစ္စတစ်ခုတည်းလည်း မဖြစ်နိုင်တော့ဘူး။ လူသားအကျိုးပြုလုပ်ငန်းချည်းပဲလည်း မဟုတ်တော့ဘူး။ လောကုတ္တရာအရေး၊ သံသရာအရေး၊  ဘ၀လွတ်မြောက်ရေးကိစ္စတွေကိုပါ ထည့်စဉ်းစားဖို့လိုအပ်လာပါတယ်။ ဒီတော့ Career ကို ပြောင်းတဲ့အခါမှာ လောကီကြီးပွားရေး၊ Society ဖွံ့ ဖြိုးတိုးတက်ရေးချည်းမဟုတ်ပဲ မိမိရဲ့  Insight Development ကိုပါ ထည့်တွက်ဖို့ လိုလာပါလိမ့်မယ်။

ဒီတော့ Peter Drucker ရဲ့  အဖြေတွေကို မှီးပြီး ကျန်နေတဲ့သက်တမ်းတစ်ဝက်မှာ ဘာသာရေးကိုပါ ကိုယ့်ဘ၀ထဲကအချိန်တွေကို ဖဲ့ပေးချင်တဲ့သူတွေအတွက် ဓမ္မအရေးပါ ပါတဲ့ Career အသစ်တစ်ခုကို ဘယ်လို အပြောင်းအလဲလုပ်ကြည့်ရင်ကောင်းမလဲဆိုတာကို ကိုယ့်ဖာသာ Customized လုပ်ပြီး စဉ်းစားကြည့်ကြရအောင်ဗျာ။

နံပါတ်(၁) အနေနှင့် လောကီရေးကိစ္စတွေကို လုံးဝရပ်လိုက်ပြီး၊ နောက် လူဝတ်ကိုပါစွန့်ပြီး (ရဟန်းအဖြစ်၊ သီလရှင်အဖြစ်၊ ရာသက်ပန်ယောဂီအဖြစ်နှင့်) လောကုတ္တရာသီးသန့်ပဲ လုပ်တော့မယ့်နည်းပါ။ ဒီနည်းက Risk တော့ အတော်များမယ် အမရေ။ တော်ရုံသတ္တိနှင့်တော့ လုပ်ဖို့မလွယ်ဘူးလို့မြင်တယ်။ ဒါပေမယ့် ဘုရားလက်ထက်ကစလို့ ယခုခေတ်တိုင်အောင် တချို့ သော ပုဂ္ဂိုလ်တွေ လုပ်သွားနိုင်တာတွေ့ရပါတယ်။ ရဟန်းတော်တွေထဲမှာဆိုရင် အခုလက်ရှိ ထင်ထင်ရှားရှားဖြစ်နေတဲ့ ဆရာတော်အချို့ ကို  ကြည့်ရင် အဲဒီ နံပါတ်(၁) အဖြေကို လိုက်သွားကြတဲ့သူတွေဆိုတာ သတိထားမိပါတယ်။ သီလရှင်တွေထဲမှာလည်း အနည်းအကျဉ်းတော့ တွေ့မိတယ်။ ရာသက်ပန်ယောဂီလုပ်သွားတဲ့သူ အချို့ လည်း ရှိပါတယ်။ ကျွန်တော်နှင့် မြေးအဖွားလိုချစ်တဲ့ အဖွားသားအမိနှစ်ယောက်ဆိုရင် သမီးကအသက်လေးဆယ်ကျော်၊ အမေက အသက်ခြောက်ဆယ်လောက်မှာ ပိုင်ဆိုင်တာတွေအားလုံးကို ထုခွဲရောင်းချပြီး ရိပ်သာတစ်ခုမှာ အပြီးသွားနေလိုက်ပါတော့တယ်။ အဲဒီရိပ်သာမှာပဲ နှစ်ယောက်လုံး ခေါင်းချသွားကြပါတယ်။ ဟိုရက်ပိုင်းလောက်က ဒီက ကျွန်တော့်မိတ်ဆွေတစ်ယောက်ပြောပြလို့ သိရတာ သိပ်မကြာခင်ကမှ သူ့အစ်မ၀မ်းကွဲတစ်ယောက်လည်း ပိုင်ဆိုင်တာအားလုံးကို စွန့်လွှတ်လိုက်ပြီး ဆရာတော်တစ်ပါးရဲ့  ရိပ်သာမှာ အပြီးသွားနေလိုက်ပါတယ်တဲ့။ ထုခွဲရောင်းချသွားတာတောင်မဟုတ်ဘူး။ အပြီးစွန့်လိုက်တာပါတဲ့ အစ်မရေ။ ကြားရတာ အံ့ဖွယ်ရှိလေစွ လို့ပဲ ရေရွတ်မိပါတယ်။

နံပါတ် (၂) ကတော့ လက်ရှိ လုပ်လက်စအလုပ်တွေကို လုပ်ရင်းနှင့် တစ်ဘက်ကလည်း ဓမ္မလမ်းကို လိုက်မယ့်နည်းပေါ့။ ဒီလို ပုဂ္ဂိုလ်တွေကတော့ ကျွန်တော်တို့တွေ ပတ်ဝန်းကျင်မှာ တော်တော်များများကိုတွေ့နေ၊ မြင်နေရပါတယ်။ လောကီဘက်က အချိန်များများ၊ လောကုတ္တရာဘက်က အချိန်နည်းနည်းယူပြီးလုပ်နေကြတဲ့သူတွေ ရှိသလို၊ လောကီဘက်က အချိန်နည်းနည်း၊ လောကုတ္တရာဘက်က အချိန်များများယူပြီး လုပ်နေကြတဲ့သူတွေလည်း တွေ့နေရပါတယ်။ ကျွန်တော့်မိတ်ဆွေတစ်ယောက်ရဲ့  မိဘနှစ်ပါးဆိုရင် တစ်ယောက်ကို တစ်လစီ အလှည့်ကျ ရိပ်သာဝင်ပါတယ်။ တစ်ယောက်ရိပ်သာဝင်နေတုန်း ကျန်တဲ့တစ်ယောက်က အိမ်မှုကိစ္စ၊ သားရေး သမီးရေးကိစ္စတွေ လုပ်ပါတယ်။ နောက်ထပ် ကျွန်တော့်အသိ ဆရာသမားတစ်ယောက်ကတော့ အမြဲတမ်း နှစ်လတစ်ကြိမ် ရဟန်းခံပြီး ဆယ်ရက် တစ်ပတ်လောက် တရားအားထုတ်တတ်ပါတယ်။

နံပါတ် (၃) အနေနှင့်ကတော့ လောကီလူဝတ်ကိုလည်း မစွန့်ပဲ လောကုတ္တရာသီးသန့်ကို ဇောက်ချလုပ်တဲ့နည်းပါ။ ဒီလိုမျိုးလုပ်နေတာမျိုးကို တွေ့ရမှာကတော့ ဘုရားလက်ထက်ကဆိုရင် စိတ္တသူကြွယ်တို့  ခုဇုတ္တရာတို့လိုမျိုးပေါ့အမရေ။ ဒီဘက်ခေတ်မှာဆိုရင်တော့ ဟိုးဘက်နှစ်တွေမှာဆိုရင် လူသိများခဲ့တဲ့ အနာဂါမ်ဆရာသက်ကြီးတို့၊ ပခုက္ကူဦးကြည်တို့၊ ဆရာကြီး ဦးဘခင်တို့၊ ဒီဘက်ခေတ်ထဲမှာဆိုရင် ဆရာကြီးဦးဂိုအင်ကာတို့၊ ဆရာမကြီးဒေါ်ခင်လှတင်တို့၊ အနောက်တိုင်းကဆိုရင် Joseph Goldstein တို့ စသဖြင့် ပြောလို့ရမယ်ထင်ပါတယ်။ တခြားလည်း အများကြီးရှိအုံးမှာပါ။ သူတို့လည်း သူတို့ဘ၀အခြေအနေတွေ၊ သူတို့ဖြည့်ခဲ့တဲ့ပါရမီ၊ တောင်းခဲ့တဲ့ဆုတောင်းတွေကြောင့် လူဝတ်ကိုမစွန့်ပဲ တရားအတွက် အချိန်ပြည့် ဘ၀ပေးပြီး လုပ်ဆောင်နိုင်ကြတာဖြစ်ပါလိမ့်မယ်။

နောက်ထပ်တစ်ခါ ကိုယ့်ရဲ့  ဘ၀ပေးအခြေအနေပေါ်မူတည်ပြီး ဖြည့်ပြီးစဉ်းစားရမယ့် အချက်တွေလည်း ရှိအုံးမယ် အမရေ။ အဲဒါတွေထဲကမှ ကျွန်တော့်အနေနှင့် အသက်အရွယ်ရယ်၊ မိသားစုအခြေအနေရယ်၊ ကျန်းမာရေးရယ်ကို Highlight လုပ်ပြီး စဉ်းစားကြည့်ချင်တယ်။

အရွယ်နှင့်ပတ်သက်ပြီး ကျွန်တော်တို့ မြန်မာလူမျိုးတွေမှာ တော်တော်များများ ကိုးကားပြီး ပြောလေ့ပြောထရှိတဲ့ စကားတစ်ခုရှိပါတယ်။ “ပထမအရွယ်မှာပညာရှာ၊ ဒုတိယအရွယ်မှာ ဥစ္စာရှာ၊ တတိယအရွယ်မှာ တရားရှာ”ဆိုတဲ့စကားပါ။ အရင်ကတော့ လူကြီးတွေပြောနေကြတာ နားယဉ်နေတော့ ဒါကို သိပ်မစဉ်းစားမိပဲ ပြောဖြစ်၊ လက်ခံဖြစ်ခဲ့တာပါပဲ။ တကယ်တော့ ဒီစကားက အပြည့်အ၀မမှန်ဘူးဆိုတာ တကယ်လက်တွေ့ဘ၀ကို ဖြတ်သန်းလာတဲ့အချိန်မှာ တစ်စတစ်စ ထင်ရှားလာပါတယ်။ ပညာဆိုတာ တကယ်တော့ ပထမအရွယ်တစ်ခုတည်းရှာလိုက်ရုံနှင့် မပြီးသွားတာမျိုးပါ။ သေတဲ့အထိ ကိုယ့်အတွက် လိုအပ်မယ့် ပညာအမျိုးမျိုးက သင်ယူနေရဆဲပါပဲ။ ဥစ္စာရှာတာလည်း ထိုနည်းလည်းကောင်းပါပဲ။ ပြည်တွင်းမှာရော၊ ပြည်ပမှာပါ ပထမအရွယ်မှာကတည်းက အလုပ်လုပ်ပြီး ပိုက်ဆံရှာနေကြရတဲ့လူငယ်တွေကို မြင်နေ တွေ့နေရတာပါပဲ။ မရှာလို့မှမရတာ။ ခေတ်အခြေအနေ၊ ဘ၀အခြေအနေတွေအရ ရှာမှဖြစ်တော့မှာမို့ ရှာနေကြရပါတယ်။ အခြေအနေမပေးခဲ့ရင် တတိယအရွယ်တိုင်အောင်လည်း ဥစ္စာစီးပွားဆိုတာကြီးက ဆက်ရှာနေကြရတာပါ။

တရားရှာတာမှာကတော့ တတိယအရွယ်အထိ မစောင့်ပဲ စောနိုင်သမျှ စောလေ ကောင်းလေပဲလို့ မြတ်စွာဘုရားရှင်ပြောထားခဲ့တဲ့စကားတော်က ရှိပြီးသားပါပဲ အမရေ။ တရားကို စောစောမရှာလို့ အကျိုးဆုတ်ယုတ်ရပုံနှင့် ပတ်သက်ပြီး ဓမ္မပဒက ဂါထာလေးတစ်ပုဒ်ရှိပါတယ်။

သူမိုက်တို့သည် အရွယ်ရှိခိုက် မြတ်သောအကျင့်ကို မကျင့်လိုက်မိ၊ ဥစ္စာကိုလည်း မရလိုက်မိ သောကြောင့် ငါးကုန်ခမ်းသော ညွန်အိုင်၌ အတောင်ကျွတ်သော ကြိုးကြာအိုတို့ကဲ့သို့ အရွယ်လွန်သောအခါ  ကြံမှိုင်၍သာ နေကြရကုန်၏။

သူမိုက်တို့သည် အရွယ်ရှိခိုက် မြတ်သောအကျင့်ကို မကျင့်လိုက်မိ၊ ဥစ္စာကိုလည်းမရလိုက်မိသောကြောင့်

လေးမှ လွတ်ပြီးနောက် အရှိန်ကုန်သော မြှားကဲ့သို့ ရှေးဖြစ်ဟောင်းသုခတို့ကို ညဉ်းတွား အောက်မေ့၍သာ   နေကြရကုန်၏။  ( ဓမ္မပဒ . ဇရာဝဂ္ဂ ၁၅၅၊ ၁၅၆ မဟာဓနသေဋ္ဌိ )

မြတ်စွာဘုရားရှင်ကိုယ်တော်မြတ်ကြီးက အခါတစ်ပါးမှာ တောင်းစားရတဲ့  ဘ၀ကို ရောက်နေကြတဲ့ မဟာဓနသူဋ္ဌေးလင်မယား အဖိုးကြီးအဖွားကြီး နှစ်ယောက်ကို မြင်ပြီး အရှင်အာနန္ဒာကို ပြောခဲ့တာရှိပါတယ်။ ဒီလင်မယားနှစ်ယောက်ဟာ ပထမအရွယ်မှာ တရားအားထုတ်ရင် ယောကျာ်းက ရဟန္တာ၊ မိန်းမက အနာဂါမ်ဖြစ်မယ်၊ ဒုတိယအရွယ်မှာအားထုတ်ရင် ယောကျာ်းကအနာဂါမ်၊ မိန်းမက သကဒါဂါမ်ဖြစ်မယ်၊ တတိယအရွယ်မှာ အားထုတ်ရင်တောင် ယောကျာ်းက သကဒါဂါမ်၊ မိန်းမက သောတာပန်ဖြစ်အုံးမယ် စသဖြင့်ပေါ့။ အခု နောက်ဆုံး သေခါနီးအရွယ်ရောက်မှတော့ ဘာမှလုပ်လို့မရတော့ဘူးဆိုတာလေး ပြောသွားခဲ့တာ အမလည်း သိပြီးသားပါ။ ဒီတရားတော်ကို ဖတ်ရတော့ အသက်အရွယ်နှင့် တရားအသိဉာဏ်ရဖို့နှင့် ဆက်နွှယ်နေမှုကို စေ့စေ့တွေးလေ ထိတ်လန့်သံဝေဂရဖြစ်ရလေပါပဲ။

နောက်တစ်ချက်ဖြစ်တဲ့ မိသားစုအခြေအနေဆိုတာလေးကို တွေးကြည့်မိတယ်။ ကျွန်တော်တို့တွေမှာ အသီးသီး ဆိုင်ရာ မိသားစုအသိုက်အမြုံတွေ ကိုယ်စီရှိနေကြပါတယ်။ ကိုယ်က အဲဒီမိသားစုမှာ အရေးပါတဲ့အခန်းကဏ္ဍကနေပါဝင်နေရတဲ့သူ၊ ဦးစီးဦးဆောင်လုပ်နေရတဲ့သူဆိုရင် ဘ၀ဦးတည်ချက်ကို ဓမ္မဘက်လှည့်တော့မယ်လို့ ဆုံးဖြတ်တော့မယ့်အခါဆိုရင် အတော်လေးဦးနှောက်ကို အလုပ်ပေးရပါလိမ့်မယ်။ သားသမီးရှိတဲ့သူဆိုရင် သားသမီးတွေကို လက်လွှတ်လို့ရတဲ့ အခြေအနေဖြစ်ပြီလား၊ သူတို့တွေ ကိုယ့်ခြေထောက်ပေါ် ကိုယ်ရပ်နိုင်တဲ့အနေအထားမျိုးဖြစ်ကြပြီလားဆိုတာမျိုး၊ ဇနီးခင်ပွန်းတွေကရော ကိုယ့်အပေါ်နားလည်မှုပေးနိုင်တဲ့ အနေအထားမှာ ရှိပြီလားဆိုတာမျိုး၊ မိဘတွေကို လုပ်ကျွေးပြုစုနေရတဲ့သူတွေဆိုရင်လည်း မိဘတွေကို ဘယ်သူက ဆက်ပြီး တာဝန်ယူစောင့်ရှောက်ပေးနိုင်မလဲဆိုတာမျိုး၊ ကိုယ့်အနေနှင့် ဆက်ပြီးမိသားစုတာဝန်ကို မလုပ်ပေးနိုင်တော့တဲ့အချိန်မှာ ကျန်နေခဲ့မယ့်သူတွေ ဆက်ပြီး ရင်းနှီးစားသောက်နေထိုင်နိုင်ဖို့အတွက် လုံလောက်ပြည့်စုံမှုရှိမရှိဆိုတာမျိုးတွေ ထောင့်စေ့နေအောင် စဉ်းစားရပါလိမ့်မယ်။

ကျွန်တော် ရိပ်သာတစ်ခုမှာ ဦးဇင်းတစ်ပါးအကြောင်းသိခဲ့ရဖူးတယ်။ အသက်ငါးဆယ်ကျော်အရွယ်မှာ တရားတွေအားထုတ်ရင်း လောကီကို စိတ်ကုန်လာတော့ ဘုန်းကြီးဝတ်ချင်လာတယ်။ ဒီတော့ သူက ရဟန်းမ၀တ်ခင် အိမ်စီးပွားကို အဆင်ပြေအောင် အကုန်စီစဉ်ပေးခဲ့ပြီး ရဟန်းဝတ်လိုက်တော့တယ်။ ဒါပေမယ့် ကျန်ခဲ့တဲ့မိသားစုမှာ အရွယ်မရောက်သေးတဲ့ သားသမီးတွေက ပညာရေးတန်းလန်းတွေနှင့် ကျန်နေခဲ့တော့ ဇနီးလုပ်တဲ့သူက ရိပ်သာဆရာတော်ကြီးဆီသွားပြီး သူ့ယောကျာ်းကို ရဟန်းဝတ်ပေးလိုက်လို့ အပြစ်တင်ပါတယ်။ ဒါနဲ့ နောက်ပိုင်းဆရာတော်ကြီးက ဒီလိုကိစ္စမျိုးတွေအတွက် ရဟန်းအပြီးဝတ်ချင်တဲ့ ယောဂီတွေဆိုရင် သား၊ သမီးတွေ လက်လွှတ်နိုင်တဲ့အခြေအနေအထိ ရောက်အောင်စောင့်ဖို့၊ ဒီကြားထဲတော့ လူဝတ်ကြောင်ဘ၀နှင့်ပဲ မိသားစုတာဝန်ထမ်းရင် တရားအားထုတ်နေဖို့ မိန့်တော်မူပါတယ်။ အားထုတ်ပုံနည်းလမ်းလည်း ပေးတော်မူပါတယ်။

တချို့  အပျိုကြီး၊ လူပျိုကြီးတွေကျပြန်တော့ အသက်အရွယ်ကြီးနေပြီဖြစ်တဲ့ မိဘတွေကို လုပ်ကျွေးစောင့်ရှောက်နေကြရတာတွေ ရှိတတ်ပါတယ်။ တခါတလေသူတို့တွေခမျာ တရားကို ဇောက်ချလုပ်ချင်ကြပေမယ့် မိဘတွေကို ပြန်ငဲ့နေရလို့ စိတ်သွားတိုင်း ကိုယ်မပါနိုင်ဖြစ်နေတာမျိုးတွေ တွေ့ဖူးပါတယ်။ ကိုယ်ကလွဲပြီး တခြားမိဘကို စောင့်ရှောက်ပေးနိုင်မယ့် ဆွေမျိုးသားချင်းမျိုး မရှိနေဘူးဆိုရင်တော့ သူတို့မှာ ရွေးချယ်စရာလမ်းက မရှိပါဘူး။ မိဘကိုပဲ အသက်ထက်ဆုံး လုပ်ကျွေးပြုစုပြီး တရားကိုလည်း နိုင်သလောက်အားထုတ်နေဖို့ပဲရှိပါတယ်။ တကယ်လို့ ကိုယ့်ကိုယ်စားစောင့်ရှောက်ပေးနိုင်မယ့်သူတွေလည်း ရှိမယ်၊ မိဘကလည်း လိုလိုလားလားခွင့်ပြုမယ်ဆိုရင်တော့ အတိုင်းထက်အလွန်ပဲပေါ့။

နောက်တစ်ချက် ကျန်းမာရေးအကြောင်း ပြောကြည့်မယ်။

“အိုမှုကနေ နာမှုမကူးခင် ၀ိပဿနာအလုပ်အားထုတ်ကြပါ။” လို့ ဆရာတော်ဘုရားကြီးတွေက ဆုံးမမှာကြားထားခဲ့ကြပါတယ်။

ခန္ဓာကိုယ်မှာ ကျန်းမာရေးလည်းကောင်းနေတုန်း၊ အရိုးတွေ၊ အကြောတွေ သန်မာတုန်း၊ သွားနိုင်လာနိုင်တုန်း၊ ရောဂါကြီးကြီးမားမားမရှိတုန်းမှာ တရားအလုပ်ကို ထိထိရောက်ရောက် ကြိုးပမ်းအားထုတ်ထားသင့်ပါတယ်။ တကယ်လို့ ခန္ဓာကိုယ်မှာ တစ်ခုခုချွတ်ယွင်းလာတော့မှ အားထုတ်ကြမယ်ဆိုရင် သတိအားကလည်း မလိုက်နိုင်၊ စိတ်အားကလည်းနဲနေပြီိး၊ ခန္ဓာကိုယ်ကလည်း လူကောင်းတစ်ယောက်လို မဟုတ်တော့တဲ့အခါကျမှဆိုရင် အတော်ကို ခက်ခက်ခဲခဲ ဆင်းရဲပင်ပန်းကြီးပြီး အားထုတ်ရပါတော့တယ်။

ရိပ်သာတွေမှာ တရားစခန်းဝင်ကြတဲ့ ယောဂီတွေမှာ တချို့  အချိန်ကြာကြာမထိုင်နိုင်တဲ့သူတွေ၊ ခဏခဏ အပေါ့အလေးသွားနေရတဲ့သူတွေ၊ အာရုံကြောအားနည်းနေတဲ့သူတွေ၊ ကိုယ်လက်အင်္ဂါချို့ ယွင်းနေကြတဲ့သူတွေ လာပြီး အားထုတ်တတ်ကြတာ အမလည်း မြင်ဖူးမှာပါ။ ဘာပဲပြောပြော သူတို့တွေကမှ ရိပ်သာအထိ ရောက်အောင်လာနိုင်ကြလို့ တော်ပါသေးတယ်။ တချို့ ပုဂ္ဂိုလ်တွေများဆို ကိုယ့်အိမ်မှာတင် ဘယ်မှ မသွားနိုင်တော့တဲ့အခြေအနေမျိုးဖြစ်နေကြပြီ။ အဲဒီအချိန်ကျတော့မှ တရားစအားထုတ်မယ်ဆိုရင်တော့ အတော်ကို မလွယ်တော့တာပါပဲ။ ကျွန်တော့်သူငယ်ချင်းရဲ့ မိခင်တစ်ယောက်ဆိုရင် ရုတ်တရတ်လေဖြတ်ပြီး အိပ်ယာပေါ်လှဲနေရတော့တယ်။ အဲဒီအချိန်မှာ တရားအားထုတ်တာတောင် မဟုတ်သေးဘူး။  ပုတီးစ်ိတ်ဖို့ကိုတောင်မှပဲ စိတ်အား၊ လူအားအတော်ကြီးစိုက်ပါမှ ပုတီးလုံး တစ်လုံးကိုချနိုင်တဲ့အဖြစ်မျိုးကို မြင်တွေ့ခဲ့ဖူးပါတယ်။

တကယ်တော့ နာမှုဆိုတာက အိုတဲ့အထိတောင်မစောင့်ပါဘူး။ အရွယ်ငယ်ငယ်နှင့်လည်း နာကြရတဲ့သူတွေအများကြီးပါပဲ။ နာရာကနေတဆင့် အိုတာကိုကျော်ချပြီး သေသွားကြတာတွေလည်း ဒုနှင့်ဒေးပါပဲ။ လွန်ခဲ့တဲ့ နှစ်နှစ်ကျော်တုန်းက ကျွန်တော့်ဘလော့ဂ်မှာ စာလာဖတ်ရင်းကနေ အွန်လိုင်းမှာခင်မင်ခဲ့ရတဲ့ ဆရာဝန် အစ်မတစ်ယောက်ဆို အသက်သုံးဆယ်ကျော်၊ လေးဆယ်နီးပါးထဲကပါပဲ။ တစ်ရက်တော့ သူခွဲစိတ်ကုသမှုတစ်ခု ခံစရာရှိတယ်လို့ဆိုပြီး ပြောသွားတယ်။ နောက် ဆေးရုံတက်နေရင်း ကျွန်တော့်ဆီကို အီးမေးလ်တစ်စောင်လှမ်းပို့လိုက်သေးတယ်။  နောက်တော့ အွန်လိုင်းမှာ တော်တော်ကြာကြာ ပျောက်နေရာက မေးကြည့်လိုက်တော့ ခွဲစ်ိတ်ကုသမှုခံရင်း ဆုံးသွားပါပြီတဲ့။ သူဆိုလည်း ဘာသာရေးကို စိတ်ဝင်စားပြီး တရားအားထုတ်မှုပိုင်းကို စဖို့အားယူနေတုန်း လေ့လာနေတုန်းမှာတင် ဘ၀ကအဆုံးသတ်သွားခဲ့ရပါတယ်။

ဒီတော့ နာမှုနှင့် သေမှုက လူတစ်ယောက်ဆီကို ဘယ်အချိန် လာမယ်မှန်းမသိလေတော့ သူတို့မလာခင် သူတို့ကို အေးအေးချမ်းချမ်းရင်ဆိုင်နိုင်မယ့် တရားဆိုတဲ့ လက်တွဲဖော်ကို ကျန်းမာနေတုန်းမှာ တစ်နိုင်တစ်ပိုင်အချိန်ပေးပြီး ရှာထားဖို့က မဖြစ်မနေလိုအပ်လှပါတယ်နော် အမရေ။

Peter Drucker ရဲ့  What to do with the second half of one's life? ဆိုတဲ့မေးခွန်းကို ဘာသာရေးရှုထောင့်ကိုပါ ထပ်ပေါင်းထည့်ပြီး ကျွန်တော်စဉ်းစားမိသလောက် အဖြေထုတ်ကြည့်လိုက်တာပါ။ အစ်မလည်း ဒီမေးခွန်းရဲ့ အဖြေကို ကိုယ့်ဘ၀အခြေအနေတွေနှင့်ချိန်ပြီး ထုတ်ယူနိုင်လိမ့်မယ်ဆိုတာ ကျွန်တော်ယုံကြည်နေပြီးသားပါဗျာ။

ဘ၀သက်တမ်းတစ်ဝက်မှာဘာတွေဘယ်လို ပြင်ဆင်ရမယ်ဆိုတာတွေကို အဖြေရှာပြီးသွားတော့ မသေခင်သိရှိသွားရမယ့် ဘ၀ရဲ့  လျှို့ ဝှက်ချက်တွေအကြောင်းလည်း ကြုံတုန်းတစ်ခါတည်း နည်းနည်းလောက် ပြောလိုက်ချင်သေးတယ် အမရေ။ အမရဲ့  ရွှေရတုမွေးနေ့အတွက် အထူးအမှတ်တရဖြစ်အောင်လို့ပါနော်။

လွန်ခဲ့တဲ့ သုံးလေးလလောက်ကဖြစ်မယ်။ မဟာမြိုင်ဆရာတော်ဦးဇောတိက စင်္ကာပူကို ခဏကြွလာတာ အွန်လိုင်းမှာ ဖူးလိုက်ရပါတယ်။ ဓါတ်ပုံတွေမှာ ဆရာတော်လက်ထဲ စာအုပ်တစ်အုပ် ကိုင်ထားတာ တွေ့လိုက်တော့ ဘာစာအုပ်လဲမသိဘူးဆိုပြီး စပ်စုမိတယ်။ ဆရာတော်ကို သွားဖူးခဲ့တဲ့ စင်္ကာပူက ညီမတစ်ယောက်က စာအုပ်နာမည်ကို မှတ်လာပြီး ပြန်ပြောပြလို့ အွန်လိုင်းမှာ ရှာပြီး ဖတ်ကြည့်ဖြစ်ခဲ့တယ်။ ဆရာတော်ဖတ်နေတဲ့ စာအုပ်နာမည်က John Izzo ရေးတဲ့ The Five Secrets You Must Discover Before You Die တဲ့။ စာရေးဆရာနှင့် သူ့အဖွဲ့ က အသက် (၆၀) ကျော် အရွယ်ရှိကြတဲ့ လူပေါင်း ၂၀၀ကျော်ကို အင်တာဗျူးလုပ်ပြီး သူတို့ပြောပြချက်ကနေ ရေးထားတာပါ။

အချက် (၅)ချက်က ဘာတွေလဲဆိုတော့

(၁) ကိုယ့်ကိုယ်ကို ရိုးသားနိုင်ဖို့

(၂) ဘ၀မှာ စိုးရိမ်ပူဆွေးမှုနှင့် နောင်တတရားတွေ ကျန်မနေခဲ့ဖို့

(၃) ကိုယ်ကိုယ်တိုင်အပါအ၀င် ကိုယ့်မိသားစု၊ ကိုယ်နှင့်ဆက်ဆံနေရတဲ့သူတွေကို ချစ်တတ်ဖို့

(၄) ဘ၀ကို လက်ရှိပစ္စုပ္ပါန်အချိန်လေးမှာပဲ နေတတ်ဖို့

(၅) လောကကို ကိုယ်ယူထားတာတွေထက် ပိုပြီး ပြန်ပေးနိုင်ဖို့ ပါတဲ့။

ဒီအချက် ငါးချက်ကိုသာ မသေခင်တွေ့ရှိခဲ့မယ်ဆိုရင် ဒီလူဟာ သေပျော်တဲ့သူတစ်ယောက်ဖြစ်ပါပြီတဲ့။ လူတစ်ယောက်အနေနှင့် မသေခင်သိသွားရမယ့်တရားတွေပဲပေါ့ အမရေ။

ဒီအချက်ငါးချက်ကို သေသေချာချာကြည့်လိုက်တော့ မြတ်စွာဘုရားရှင်ဟောခဲ့တာတွေနှင့်ကွက်တိဖြစ်နေတာကို အံ့သြဖို့ကောင်းလောက်အောင် တွေ့လိုက်ရတယ်။ မြို့ ပတ်ရထားကြီး ဘယ်ဘူတာကိုပဲသွားသွား နောက်ဆုံးတော့ ဒီဘူတာကိုပဲ ပြန်ဆိုက်ရတယ် ဆိုတာလို ကမ္ဘာပေါ်က အသိပညာရှင်တွေ၊ တွေးခေါ်ပညာရှင်တွေ ကြံဆတွေးခေါ်လိုက်သမျှ၊ တွေ့ရှိလိုက်သမျှအမှန်တရားဆိုတာတွေဟာ ဘုရားရှင်ရဲ့  သစ္စာတရားမှာပဲ နောက်ဆုံးဂိတ်ဆုံးရတာပါပဲနော်။

ကဲ...အမရေ။ အမရဲ့  ရွှေရတုမွေးနေ့အတွက် ကျွန်တော် အမအသုံးတည့်လောက်မယ်လို့ မျှော်လင့်ပြီး ဒီစာစုလေးကို မွေးနေ့လက်ဆောင်အဖြစ်နှင့် ရေးပေးလိုက်ပါတယ်။ အသုံးမတည့်ခဲ့ရင်တောင်မှ အမှတ်တရအဖြစ်နှင့်တော့ သိမ်းထားဖြစ်လိမ့်မယ်လို့တော့ ထင်ပါတယ်။

အစ်မတစ်ယောက် ကျန်ရှိနေတဲ့သက်တမ်းတစ်ဝက်ကို အနှစ်သာရအပြည့်အ၀နှင့် အသုံးချရင်း ရည်မှန်းထားရာ ၊ ဆုတောင်းထားရှိရာ ပန်းတိုင်ဆီကို အခက်အခဲမရှိ၊ ဘေးမထိပဲ အေးချမ်းအောင်မြင်စွာ ရောက်အောင်သွားနိုင်တဲ့သူ တစ်ယောက်ဖြစ်ပါစေကြောင်း စစ်မှန်တဲ့ မေတ္တာအာသီသနှင့် ဆုတောင်းပေးလိုက်ပါတယ်နော် အမရေ။

အမရဲ့  မောင်ငယ်

Bliss

19.07.2012 (Thu.)

ဆက်လက်ဖတ်ရှုရန်

Autobiography Of Sayadaw U Jotika

 

Sayadaw U Jotika (Autobiography)

***************************

The need to express is very strong. It is very important for our growth. If you don't have any opportunity to express, you lose creative thinking. Well, that's another attachment. I can't force myself to let go of it. Many times I picked up my pen to write, and many times I put it down. Something hard to put into words is in my mind. Pl

ease don't think I'm preaching. I'm just expressing my personal point of view (feeling, observation) which seems true to me.

I know that a lot of things I've said can easily be misconstrued. A person can use them against me. I can't really make my points clear in a letter. Even to talk about them would be a very difficult task for me. Anyway I tried to express my views. The things I've said might not agree with the great books. I don't expect you to agree with me. They are not universal truths. Just my opinions as of October 1986. I'm liable to change, as anything else. Excuse me for my mistakes.

I'm a man who keeps himself upset all the time, believe it or not. One day I'll be happy. Here is something about me. I was born on 5 August 1947. I was educated at a Roman Catholic missionary school. I read about most of the things in this universe. I did not believe in any organised religion. Well, who knows? I thought of becoming a bhikkhu (monk) from the age of nineteen but instead I went to university, and found the education very unsatisfactory. I then educated myself. I found that almost everybody was after position, money, pleasure — very superficial.

I couldn't go on living for the rest of my life like that. I left my family although 1 love my daughters very dearly. I have no place in this competitive society. Being a bhikkhu and living in the forest is the best way of life for me; it suits my temperament.

Yes, my grand mother was Shan. She lived a long, peaceful life and died when she was about eighty. I was fourteen then. We were very close. I think of her quite often.

I like Shan people, too. They are very mellow. There are a lot of Shan people around Maymyo; some living in Ye Chan Oh Village where we are. There is another village called Yengwe where most of the villagers are Shan, and they speak the Shan language. Some old Shan ladies look like my grandmother — quiet, peaceful, loving, simple, patient, content, unimposing and very friendly. How unlikely to find such people in modern cities. People who are rich are very suspicious; they think people are after their money.

You asked me about my relationship with my family. It was never good. The only person I love in my family is my elder sister. She loves me although she could not understand me.

Yes, "I've never felt I belong to that family". I was like a stranger in my family. Maybe some day I'll go and see my sister. My relationship with my parents was a love-hate relationship. (Both of them are dead now.) I was very lonely at home. I know how you feel about your relationship with your family. It's OK. We find love and understanding elsewhere. No matter what you do and no matter what happens I will always be your father, brother, friend, counsellor, etc.

I live on the border of two different cultures — Eastern and Western. Born in Burma (Myanmar) and educated in a Western-style school. Being exposed to all different kinds of religions — Buddhism, Christianity, Judaism, Hinduism, Islam — and also to materialism through philosophy. I ended up not believing in anything seriously. Western psychology — Freud, Jung, Adler, Rogers, Laing, William James, and many others; Western philosophy — Socrates, Plato, Aristotle, Hegel, Kant, Nietzsche, Kierkegaard, Bertrand Russell, Wittgenstein, Bergson, etc. — enough to make a person very confused. I studied electrical engineering; read advanced scientific theories, including black holes.

I know how little people are sure of anything. The most important thing to know is your own mind. Yes, I want freedom. And this should be known from the outset. My freedom is not for sale.

Living too long in one place makes me feel like I'm in prison. I'm a lion, according to the Burmese tradition. I really feel like roaming in the mountains like a mountain lion. Ah, freedom... I can't tolerate any restriction, bond, or tie. Even attachment that restricts my freedom is not to my liking. People get attached to me and I see that as a danger to my freedom. I love freedom and I can't exchange it for anything. I love freedom of mind too. So I am seeing more and more what imprisons the mind. Although I've read a lot of the Pitaka [see glossary for definition], when I find something (see something) it's like I'm making a new discovery. To discover for myself those simple truths — what a great joy! Eureka!

I can't stand those people who talk like they know about something just because they've read about it in books. But sometimes I catch myself doing just that, though I'm doing it less and less.

Mountain lion I am. Alone, but not lonely anymore. I have learnt to live alone. Sometimes I want to express my deepest understanding, but it's hard to find a person who knows how to listen, understand and appreciate. Mostly I'm the one who listens. People like to talk to me.

I think wanting to be independent and free (physically as well as mentally) is my strongest desire. There are different forms and stages of freedom. I must follow my nature, at all costs. I might have to disappoint my friends. So many people expect so much of me. It is very unlikely that I can/will fulfil their expectations of me. I am heading towards my own freedom, not conformity.

I've been reading Memories, Dreams, Reflections by Carl Jung. I am very interested in some of his ideas. Some of the things he said about himself really expresses me also. So I am going to quote some of the passages to you: "As a child I felt myself to be alone, and I am still, because I know things and must hint at things which others apparently know nothing of, and for the most part do not want to know."

Loneliness does not come from having no-one around oneself, but from being unable to communicate the things that seem important to oneself, or from holding certain views that others find inadmissible. If a man knows more than other people, he becomes lonely. But loneliness is not necessarily inimical to companionship, for no-one is more sensitive to companionship than the lonely man, and companionship thrives only when each individual remembers his/her individuality and does not identify him/herself with others.

I have to obey that inner law which is imposed upon me, leaving me no freedom of choice. Of course I did not always obey it. How can anyone live without inconsistency? ("Talking about rebirth — in my case it must have been primarily a passionate urge toward understanding which brought about my birth, for that is the strongest element in my nature.")

"I have also realised that one must accept the thoughts that go on within oneself of their own accord as part of one's reality. The categories of true and false are, of course, always present but because they are not binding they take second place. The presence of thoughts is more important than our subjective judgment of them. But neither must these judgments be suppressed, for they are also existent thoughts which are part of our wholeness." (So, be mindful of everything.)

A person who has not passed through the inferno of their passions has never overcome them. They then dwell in the house next door, and at any moment a flame may dart out and set fire to his own house. Whenever we give up, leave behind, and forget too much, there is always the danger that the things we have neglected will return with added force. (Don't sit on top of your passions; be mindful of them. For me, 'passed through' doesn't mean 'acted out', it means being aware of them, experience them mindfully.)

"Indeed, our 'cult of progress' is in danger of imposing onus even more childish dreams of the future the harder it presses us to escape from the past. Reforms by advances, that is, by new methods or gadgets, are of course impressive at first, but in the long run they are dubious and in any case dearly paid for. By no means do they increase the contentment or happiness of people on the whole. Instead, they are deceptive sweetenings of existence, like speedier communications, which unpleas antly accelerate the tempo of life and leave us with less time than ever before." (So, live as simply as possible.)

I have done without electricity, and tend the fireplace and stove myself. Evenings, I light the old lamps. There is no running water, and I pump the water from the well. I chop the wood and cook the food. These simple acts make man simple; and how difficult it is to be simple. In Bollingen, silence surrounds me almost audibly, and I live in modest harmony with nature. An indescribable stillness prevailed.

In the Tower at Bollingen it is as if one lived in many centuries simultaneously. The place will outlive me, and in its location and style it points backward to things long ago. There is very little about it to suggest the present. If a man of the sixteenth century were to move into the house, only the kerosene lamp and the matches would be new to him; otherwise, he would know his way about without difficulty. There is nothing to disturb the dead, neither electric light nor telephone. (Carl Jung)

There is a lot more left, but I want to stop here. You must be bored to death. I think I am a rebel in some ways. All my life I've been a rebel. My fantasy: living deep in the mountains, away from people and noise with bare necessity; quietly and peacefully. Do I cry? Well, who would believe that an old monk like me still has tears to cry. My nature is like slow burning ember. You don't see the flame but it burns nonetheless. I don't want judgment; I want understanding. I am also not perfect.

I am becoming even more imperfect. So I'm scared of those who are judgmental. I want to be left alone. They say a monk shouldn't be attached to any body or anything but I can't do that. I'm not just a monk; I'm also a human being. I am not trying to be somebody. I just try my best to understand whatever is happening in my life, in my mind, in my heart. No name and no fame; when I die nothing will remain. 

ဆက်လက်ဖတ်ရှုရန်

ဗောဇ္ဈင် (၇) ပါး တရားတော်

 

Version (1)

Version (2)

လွန်ခဲ့တဲ့ လေးနှစ်နီးပါးအချိန်၊ ကျွန်တော် ဘလော့ဂ်စရေးခါစက ကျွန်တော့်ဘလော့ဂ်မှာ မဟာဗောဓိမြိုင်ဆရာတော်ကြီးရဲ့  ဗောဇ္ဈင် (၇) ပါး တရားတော်ကို တင်ခဲ့ဖူးပါတယ်။ အဲဒီတုန်းက မှတ်မှတ်ရရ ဓမ္မဘလော့ဂ်ဂါတစ်ယောက်က အဲဒီတရားကို နာပြီးသွားတော့ သူဆက်လျှောက်ရမယ့်ဓမ္မလမ်းအတွက် သိချင်တာတွေ ဆရာတော်ကြီးတရားထဲကနေ သိလိုက်ရလို့ တကယ်အကျိုးများကြောင်း၊ အခုအချိန်ကစပြီး သူအားထုတ်မှုအတွက်အချိန်ပေးတော့မှာမို့ ဘလော့ဂ်လည်း ဆက်ရေးတော့မှာမဟုတ်ကြောင်း ကျွန်တော့်ကိုလည်း တခါတည်းနှုတ်ဆက်သွားကြောင်းပြောသွားပါတယ်။ အဲဒီအချိန်ကတည်းက သူလည်း အွန်လိုင်းကပျောက်သွားတော့တာပါပဲ။ 

မနေ့က ဆရာတော်ကြီးရဲ့  အဲဒီတရားတော်ကို သတိတရစိတ်ထဲက ဖြစ်လာတာနှင့် ပြန်နာဖြစ်ပါတယ်။ ကျွန်တော့်ဓမ္မမိတ်ဆွေတွေကိုလည်း ပေးပြီးနာကြည့်စေချင်တဲ့စိတ်ဖြစ်မိပါတယ်။ တကယ်လို့များ အချိန်ရခဲ့ရင် နာကြည့်ကြပါအုံးလို့....

မေတ္တာဖြင့်

ဝိမုတ္တိသုခ 

ဆက်လက်ဖတ်ရှုရန်

လက်တွေ့ဘ၀ကို ပဋ္ဌာန်းနည်းဖြင့် လေ့လာသုံးသပ်ခြင်း (၃)

အသင်္ခတ ကျတော့ ဆန့်ကျင်ဘက်ပဲ။ အကြောင်းတရားတွေက စုပြီးတော့ လုပ်ထားတဲ့ဟာ မဟုတ်ဘူးတဲ့။ အဲဒီ အသင်္ခတ ကျတော့ ဘာအကြောင်းကမှ လုပ်ထားတာမဟုတ်တဲ့အရာ နိဗ္ဗာန်ဆိုတာရှိတယ်။ ကျန်တဲ့နေရာတွေ မှန်သမျှ အကြောင်းတရားတွေ စုပြီးတော့ ထုတ်လုပ်ထားတာတွေ ချည်းပဲ။ အကြောင်းကင်းပြီး ဘယ်အရာမှ မဖြစ်ဘူး။ ဟော - နိဗ္ဗာန်ဆိုတဲ့ အငြိမ်းဓါတ်ကျတော့ လုပ်ထားတာမရှိဘူးတဲ့။ ဘာလို့တုန်းဆိုတော့အကြောင်းတရားတွေ အားလုံးငြိမ်းနေတယ်။ အကြောင်းတရားတွေ ငြိမ်းနေလို့ အကျိုးတရား ဆိုတာလည်း မရှိတော့ဘူး။ အငြိမ်းဓါတ် သက်သက်ကိုပြောတာ။ အဲဒါကျတော့ အင်္သခတဆိုတာ နိဗ္ဗာန်။ နောက်တစ်ခု ပညတ္တိ ဆိုတာကတော့ သင်္ခတ၊ အသင်္ခတနှစ်ခုကို အစွဲပြုပြီးတော့ လူတွေကနေ အမည်အမျိုးမျိုးပေးထားတာ။ Concept လူတွေရဲ့  အယူအဆ တစ်ရပ်၊ နာမည်အမျိုးမျိုးပေးထားတာ။ အတွင်းအနှစ်မဟုတ်ဘူး။

အဲဒီတော့ ပစ္စယပိုင်းမှာ ကြည့်လိုက်မယ်ဆိုရင် အကြောင်းဆိုတဲ့ထဲမှာ သင်္ခတဆိုတဲ့ အကြောင်းရှိတယ်၊ အသင်္ခတဆိုတဲ့ အကြောင်းရှိတယ်။ ပညတ္တိ ဆိုတဲ့ အကြောင်းရှိတယ်။ အကြောင်းသုံးမျိုးတဲ့ ပဋ္ဌာန်းမှာ။ ဟေတုပစ္စယော၊ အာရမ္မဏပစ္စယော၊ အဓိပတိပစ္စယော ဆိုတဲ့ ဒီပစ္စယတွေအကုန်လုံး ပြောသွားတဲ့အထဲမှာ ဟောဒီ လိုရင်းအချု့ပ်ကတော့ ဒီသုံးခုပဲ။ ဒီသုံးခုထဲကနေပဲ ပြောနေတာ။ ကဲ ပစ္စယုပ္ပန္နပိုင်း အကြောင်းကြောင့် ဖြစ်လာတဲ့ အကျိုးတရားပိုင်းကို ကြည့်မယ်ဆိုရင် သင်္ခတ တစ်မျိုးပဲ ရှိတယ်။သင်္ခတဆိုတာ အကြောင်း တရားတွေက စုပြီးထုတ်လုပ်ထားတဲ့ အကျိုးတရားဆိုတာ စိတ်ရယ်၊ စေတသိက်ရယ်၊ ရုပ်ရယ် ဒါကိုပြောတာနော်။ အဲဒီတော့ ဘုန်းကြီးတို့တတွေမှာ ရှိနေတာဟာ စိတ်ရယ်၊ စေတသိက်ရယ်၊ ရုပ်ရယ် ဒါပဲရှိတာ။ အကျဉ်းအားဖြင့်  ပြောမယ်ဆိုရင် နာမ်နဲ့ရုပ် ဒီနှစ်ခုရှိတယ်။ Body and Mind ဒီနှစ်ခုပဲရှိတာ။ အဲဒီနှစ်ခုသည် အကြောင်းတရားဘက်မှာလည်း ပါတယ်။ အကျိုးတရားဘက်မှာလည်း ပါတယ်။ နိဗ္ဗာန်က အကြောင်းတရားဘက် သက်သက်မှာသာ ပါတယ်။ အကျိုးတရားဘက်မှာ မပါဘူးဆိုတာကို သတိထားဖို့ပေါ့နော်။ ဒါက ပဋ္ဌာန်းကျမ်းကြီး တစ်ခုလုံးကို ခြုံငုံပြီးတော့ ကြည့်လိုက်မယ်ဆိုရင် သဘာဝအားဖြင့် ဒီမြင်ကွင်းကို မြင်ရမှာ ဖြစ်ပါတယ်။

အဲဒီတော့ အကြောင်းပြုတယ်ဆိုတာတွေဟာ စုပေါင်းလုပ်ဆောင်ထားတဲ့ အရာတစ်ခုက ထပ်မံပြီးတော့ အကြောင်းပြုတယ်။ အဲဒီလို လုပ်ဆောင်ထားတဲ့ အရာမဟုတ်တာကလည်းပဲ အကြောင်းပြုတယ်။ လူတွေယူဆ ထားတဲ့ General Consensus လို့ခေါ်တဲ့ Concept ကလည်းပဲ အကြောင်းပြုတယ်။ အကျိုးဆိုတာကျတော့ ခုနက အကြောင်းတွေက စုပြီး ထုတ်လုပ်ထားတဲ့ အရာတစ်မျိုးသာ ဖြစ်တယ်။ ပစ္စည်း၊ ပစ္စယုပ္ပန် ဒီနှစ်ခုကို အကျဉ်းအားဖြင့် ဒီလိုမှတ်ထားပေတော့။

ကဲ...ပဋ္ဌာန်း ၂၄ ပစ္စည်းကို ချုံးပြီးတော့ ပြောမယ်ဆိုရင် အတ္ထိနဲ့နတ္ထိ ဒီနှစ်ခုလာမယ်။ အတ္ထိ - အားလုံးသိကြ တဲ့အတိုင်း ၂၄ ပစ္စည်းထဲမှာ အတ္ထိပစ္စယော၊ နတ္ထိပစ္စယော လို့လာလိမ့်မယ်။ အတ္ထိဆိုတာ ရှိနေတဲ့အချိန်ပိုင်းမှာ အကျိုးတရားကို ထုတ်လုပ်တာ၊ အကျိုးတရားကို Maintain လုပ်တာ အတ္ထိ။ နတ္ထိဆိုတာ မရှိတော့တဲ့နောက် ပျောက်ကွယ်သွားတော့မှ အကျိုးတရားကို Maintain လုပ်တာ။ အဲဒီတော့ အတ္ထိပိုင်းနဲ့ နတ္ထိပိုင်းလို့ နှစ်ခုခွဲ လိုက်မယ်။ ပဋ္ဌာန်း၂၄ပစ္စည်းမှာ။ ရှိနေတုန်း အကျိုးပြုတာက တစ်ပိုင်း၊ မရှိတော့မှ အကျိုးပြုတာ တစ်ပိုင်း။အဲဒီတော့ ရှိနေတုန်း အကျိုးပြုတယ်ဆိုတာကို စဉ်းစားကြည့်လိုက်မယ်ဆိုရင် ရှိနေတုန်း ကျေးဇူးပြုတယ်ဆိုတဲ့ဟာမှာ ပုရေဇာတ Born Earlier ကြိုတင်ပြီးတော့ ဖြစ်ပြီးရှိနေတုန်း ကျေးဇူးပြုတာက တစ်ခု။ သဟဇာတ Born Together အတူတူဖြစ်လာပြီး ကျေးဇူးပြုတာက တစ်ခု။ ပစ္ဆာဇာတ Born Later နောက်မှမွေးလာပြီး ကျေးဇူးပြုတာက တစ်ခု။ သုံးခုရှိတယ်အကြမ်းဖျင်းခွဲပြရမယ်ဆိုရင်။ ရှိတုန်း ကျေးဇူးပြုတာတွေ အကြောင်းတရားတွေဟာ တချို့ အကြောင်းတရားက အကျိုးတရားမပေါ်ခင် ကြိုတင် မွေးဖွားထားတာ၊ ကြိုတင်ပေါ်လာတယ်။ တချို့  တရားက သူမွေးမွေးချင်း အကျိုးတရားပါ တခါတည်းပါလာတယ် သဟဇာတ။ တချို့ ကျတော့ မမွေးခင်က အကျိုးတရားကရှိနှင့်နေတယ်။ နောက်မှ အကြောင်းတရားက ပေါ်လာပြီးတော့ ထောက်ပံ့တယ် ပစ္ဆာဇာတ။ အပိုင်း၃ပိုင်းရှိတယ် အတ္ထိမှာ။ အဲဒီတော့ အတ္ထိရဲ့  သဘောက ရှိနေခိုက်မှာ ကျေးဇူးပြုတယ်၊ မရှိတော့ရင် ကျေးဇူးမပြုဘူး။ ဥပမာမယ် -  ညောင်ရေအိုးထဲမှာ ထည့်ထားတဲ့ရေကလေးက ထိုညောင်ရေအိုးထဲမှာ စိုက်ထားတဲ့ ပန်းကလေး ညှိုးမသွားအောင် သူရှိနေတဲ့အခိုက်မှာ သူကျေးဇူးပြုတယ်။ အဲဒီရေမရှိတော့ရင် ကျေးဇူးမပြုနိုင်ဘူး။ ရှိနေခိုက်မှာ ကျေးဇူးပြုတာ။ အဲဒါမျိုးကို အတ္ထိလို့ခေါ်တယ်။ အတ္ထိပစ္စယောဆိုတာ ရှိနေတဲ့အခိုက်ကျေးဇူးပြုတာ။ မရှိတော့ရင် ကျေးဇူးမပြုဘူးဆိုတဲ့ အဓိပ္ပာယ်ရတယ်။ အကျိုးတရားလည်း ရှိနေရမယ်၊ အကြောင်းတရားလည်း ရှိနေရမယ်၊ ရှိနေတဲ့အခိုက်ကလေးမှာ ကျေးဇူးပြုတယ်။

သဟဇာတဆိုတာကျတော့ အကျိုးတရားနဲ့ အကြောင်းတရား ပြိုင်တူပေါ်လာပြီးတော့ အပြန်အလှန် ကျေးဇူးပြုတယ်။ ဒါရော ဖြစ်နိုင်သလားဆိုတော့ ဖြစ်နိုင်တယ်။ Born Together တွေက နေမင်းကြီးထွက်လာရင် တခါတည်း အမှောင်လည်းပျောက်သွားတယ်၊ အလင်းလည်း ရောက်လာတယ်။ တပြိုက်နက်ပဲလေ။ အမှောင်ပျောက်တာရယ်၊ အလင်းရောက်တာရယ် တပြိုက်နက်ပဲ။ Simultaneously တပြိုင်နက် ဖြစ်လာတယ်။ အလင်းက အရင်ပေါ်လာပြီး အမှောင်ကနောက်မှ ပျောက်တာ မဟုတ်ဘူး။ အမှောင်ပေါ်တာနဲ့ တပြိုင်နက် အလင်းလည်း ပျောက်သွားတယ်။ Born Together ။ နေမင်းကြီးထွက်လိုက်တာနဲ့ အလင်းက တခါတည်း ပါလာတယ်။ Born Together  - သဟဇာတ။ အဲဒီလို အကြောင်းတရားရော၊ အကျိုးတရားရော နှစ်ခုစလုံးဟာ တပြိုက်နက်ပေါ်လာပြီးတဲ့အခါ အပြန်အလှန် ထောက်ပံ့နေတာကို သဟဇာတပစ္စည်းလို့ ခေါ်တယ်။

ပစ္ဆာဇာတပစ္စည်း ကျတော့ အဓိပ္ပာယ်တစ်မျိုး။ အကျိုးတရားတွေက သူ့ဘာသူ ဆိုင်ရာ အကြောင်းကြောင့် ဖြစ်နှင့်နေတယ်။ အဲဒီ ဖြစ်နှင့်နေတဲ့ အကျိုးတရားကို နောက်မှဖြစ်ပေါ်လာပြီးတော့ ထောက်ပံ့တယ်။ သူ့ကျတော့ ဖြစ်စေတာ မဟုတ်ဘူး၊ ထောက်ပံ့တာ။ Sustain လုပ်တာ။ နောက်မှ ပေါ်လာပြီးတော့ ထောက်ပံ့ တာ။ ဒါတွေက ဖြစ်တာပေါ့။ နောက်မှရောက်လာပြီးတော့ ထောက်ပံ့နိုင်တာတွေလည်း အများကြီးရှိတာပေါ့။ အရင်မွေးထားတဲ့ ပုဂ္ဂိုလ်တစ်ယောက်ကို နောက်မှမွေးလာတဲ့ ပုဂ္ဂိုလ်က အထောက်အပံ့ပေးတာတို့။ စာပေထဲမှာတော့ ဘာနှင့်ဥပမာပေးထားတုန်းဆိုတော့ ဠင်းတငယ်လေးတွေရဲ့  ခန္ဓာကိုယ်ကိုတဲ့… အစာစားလိုတဲ့ အာသာကနေပြီးတော့ သူတို့ရဲ့  ခန္ဓာကိုယ်ကို ထောက်ပံ့ပေးထားတယ်လို့ အဋ္ဌကထာက ဒီဥပမာပေးထားတယ်။

အဲဒီဥပမာကို အဓိပ္ပါယ်ဖော်တဲ့အခါမှာ ဘယ်လိုအဓိပ္ပါယ်ဖော်ကြတုန်းဆိုရင် ဠင်းတလေးတွေဟာတဲ့… မိဘတွေကနေပြီးတော့ အစာမကျွေးဘူး။ စားရနိုး၊ စားရနိုးနှင့် မျှော်လင့်ချက်ပဲရှိတယ်။ မိဘဖြစ်တဲ့ ဠင်းတ အမေ၊ အဖေတို့ကနေ အစာကိုယူပြီးတော့ မကျွေးသည့်အတွက်ကြောင့်  သူတို့ဟာ စားရနိုးဆိုတဲ့မျှော်လင့်ချက်လေးနှင့်ပဲ အသက်ရှင်၊ ကိုယ်တိုင် အတောင်အလက်စုံတဲ့အခါမှာ ရှာပြီးစားတယ်လို့ ဒီလိုအဓိပ္ပါယ်ဖော်တယ်။ အမှန်တော့ အဲဒီအဓိပ္ပါယ်မဟုတ်လောက်ဘူးနော်။

ဘာဖြစ်လို့တုန်းဆိုတော့ ဠင်းတက အစာမကျွေးဘူးဆိုတာလည်း မဟုတ်ဘူး။ လူတွေက ဠင်းတကြီးတွေ အစာချီသွားတာကို မတွေ့လို့ ဠင်းတငယ်လေးတွေကို အစာမကျွေးဘူးဆိုတဲ့ အယူအဆတစ်ရပ်ပေါ်လာတာ။ အမှန်ကတော့ ဠင်းတကြီးတွေဆိုတာ ဠင်းတတွေက အခုခေတ်တော့ တော်တော်ရှားသွားလို့ မမြင်ဖူးတဲ့ ပုဂ္ဂိုလ်တွေလည်း ရှိကောင်းရှိမယ်။ ပုပ်စပ်နေတဲ့အသားမှ သူတို့က စားလေ့ရှိတာကို။ ခွေးသေကောင်နှင့်ဠင်းတဆိုပြီးတော့ ပြောကြတာ။ အဲဒီတော့ ဠင်းတတွေက ပုပ်နေတဲ့အသားတွေကို စားပြီး သူတို့စားတဲ့အခါမှာ သူတို့လည်ပင်းကြီးတွေက အရှည်ကြီးတွေ။ အဲဒီလည်းပင်းထဲမှာ သူတို့က သိမ်းတဲ့အိတ်ကလေးပါတယ်။ ဠင်းတရဲ့  လည်ပင်းထဲမှာ သိမ်းထားတဲ့အိတ်ရှိတယ်။ သူတို့စားတာလည်း စားတယ်။ အပိုကို သူတို့ အဲဒီလည်ချောင်းထဲမှာ ထည့်သွားတယ်။

အသိုက်ပြန်ရောက်တဲ့အခါကျတော့ ပါးစပ်ကလေးဟပေးတော့ ဟိုကောင်ကလေးတွေက လည်ချောင်းထဲက အစာတွေကို အဲဒီမှာနှိုက်စားကြတာ။ လူတွေအနေနှင့် ကြည့်မယ်ဆိုရင် ဠင်းတကြီးတွေ အစာချီသွားတာမရှိဘူး။ သူတို့ပဲ စားသွားကြတယ်လို့ ဒီလိုထင်ကြတာကို။ ထင်တော့ ဠင်းတတွေက အစာမကျွေးဘူးလို့ ဒီလိုထင်တာ။ မဟုတ်ဘူး။ ကျွေးတယ်။ လည်ပင်းထဲကနေ ပါးစပ်ဟပေးတဲ့အခါမှာ လင်းတလေးတွေက နှိုက်စားကြရတာ။ ဘယ်မိခင်ဖြစ်ဖြစ် အစာတော့ ကျွေးတာချည်းပဲ။ အစာအငတ်ထားထားရင် သေသွားမှာပေါ့နော်။  အေး…အဲဒီလိုဆိုတော့ အဋ္ဌကထာလာတဲ့အဓိပ္ပါယ်ဟာ မျှော်လင့်ချက်နဲ့ မစားရသေးတဲ့အချိန်မှာ လင်းတငယ်လေးတွေရဲ့ ခန္ဓာကိုယ်ဆိုတာက ဥကပေါက်လာလို့ ထိုဠင်းတရဲ့  ခန္ဓာကိုယ်လေးတွေက အရင်မွေးဖွားထားတယ်။ မွေးဖွားထားပေမယ့်လို့ အစာစားလိုတဲ့ အာသာဆန္ဒပေါ်လာတဲ့အခါ အဲဒီအာသာဆန္ဒကနေပြီးတော့ သူတို့ရဲ့ ခန္ဓာကိုယ်ကို ထိန်းထားတယ်ဆိုတဲ့ အဓိပ္ပာယ်လေးကို ပြောတာ၊ အချိန်ပိုင်းလေး။

လူတွေဟာ မျှော်လင့်ချက်နဲ့အသက်ရှည် ဆိုတာလိုပေါ့။ မျှော်လင့်ချက်ကလေးနဲ့ အသက်ရှည်နေတယ်ဆိုတဲ့ အဓိပ္ပာယ်။ စိတ်စွမ်းအားလို့ပြောတာ။ စိတ်စွမ်းအားကလည်း အလွန်ကြီးတယ်။ တခါတုန်းက ဒကာကြီးတစ်ယောက် သေလုမျောပါးဖြစ်နေပြီ၊ သေခါနီးနေပြီ ဆိုပါစို့။ သို့သော် အသက်က မထွက်သေးဘူး၊ ဘာလို့ အသက်မထွက်သေးတာတုန်းဆိုတော့ အဝေးမှာနေတဲ့ သူ့သားကြီး မလာသေးလို့ အသက်မထွက်သေးတာ။ သူ့သားက ကနေ့ရောက်မယ်၊ မနက်ဖြန်ရောက်မယ်နဲ့ အဲဒါမျှော်နေတာ။ အသက်က မထွက်ဘူး အဲဒါ။ ဒါလည်းပစ္ဆာဇာတပစ္စည်းပဲ။ မျှော်လင့်ချက်ကနေပြီးတော့ ဆွဲထားတာ။ သားလည်းရောက်ရော၊ ရောက်ပါပြီဆို စကားစမြည်ပြောပြီးတာနဲ့ သေသွားရော အဲဒါ။ ဒါပစ္ဆာဇာတ။ နောက်မှဖြစ်လာပြီးတော့ ထောက်ပံ့တယ်ဆိုတဲ့ သဘောကိုပြောတာ။ အဲဒါ အတ္ထိပစ္စည်း။

အဲဒီတော့ အတ္ထိပစ္စည်းနဲ့ ပက်သက်ပြီးတော့ ပစ္စည်းခွဲတွေလည်းရှိတယ်။ အဲဒီတော့ ရှိနေတုန်းမှာ အကျိုးနဲ့အကြောင်းတရား ပစ္စည်းနဲ့ပစ္စယုပ္ပန်ရှိနေခိုက်မှာ ကျေးဇူးပြုတာ၊ အဲဒီလို ကျေးဇူးပြုတဲ့အခါမှာ Born Earlier ကြိုတင်ဖြစ်နှင့်ပြီးတော့ ကျေးဇူးပြုတဲ့ ပစ္စည်းတွေရှိတယ်၊ Born Together တပြိုင်တည်းဖြစ်ပြီး ကျေးဇူးပြုတာတွေရှိတယ်၊ Born Later နောက်မှ မွေးပြီး ကျေးဇူးပြုတာတွေရှိတယ်လို့ အပိုင်း၃ပိုင်း။ အဲဒီလို ရှိနေခိုက် ကျေးဇူးပြုတာတွေကိုလည်း အတ္ထိထဲမှာ ဒီလိုမျိုး ၃မျိုးခွဲနိုင်တယ်။

နောက်တစ်ခု နတ္ထိ။ မရှိတော့မှ ကျေးဇူးပြုတာ။ မရှိတော့မှ ကျေးဇူးပြုတယ်ဆိုတာ ဒါလည်းပဲ တော်တော် ထူးဆန်းတဲ့ Condition တစ်ခုပဲ။ မရှိတာသည်ပင်လျှင် နောက်ထပ်ပေါ်ဖို့အတွက် Chance ပဲ။ မရှိတာဟာ နောက်ဟာကို ကျေးဇူးပြုတယ်။ အနန္တရပစ္စယော၊ သမနန္တရပစ္စယော၊ ဥပနိဿယ ပစ္စယော၊ အာသေ၀န ပစ္စယော၊ ကမ္မပစ္စယော၊ နတ္ထိပစ္စယော၊ ၀ိဂတပစ္စယော။ အဲဒီငါးမျိုးက မရှိတော့တဲ့နောက်မှာ ကျေးဇူးပြုတာတွေ သူက။ ရှိနေတုန်းမှာ ကျေးဇူးမပြုဘူး။ သူတို့ ချုပ်ပျောက်ပေးသွားခြင်းသည်ပင်လျှင် အကြောင်းတရားပဲ၊ ကွယ်ပေးခြင်းသည်ပင်လျှင် အကြောင်းတရားပဲ။ ဆိုပါစို့။ နေကြီး ၀င်လိုက်တာနဲ့ တပြိုက်နက် အမှောင်ရောက် မလာဘူးလား။ အဲဒီတော့ နေသည် ကွယ်ပေးခြင်းဟာ အမှောင်အတွက် Chance ပေးလိုက်တာ။ နေကြီးကသာ ဆက်ရှိနေမယ်ဆို အလင်းကြီးကဆက်ရှိနေအုံးမှာပဲလေ။ အဲဒီတော့ နေ၀င်လိုက်တာနဲ့ တပြိုင်နက် အမှောင် ရောက်လာတယ်။ နေ၀င်ဝင်ချင်းမှောင်သွားတယ်ဆိုရင် ဟော အမှောင်ဖြစ်ဖို့ရန်အတွက် Chance တစ်ခုပေး လိုက်တာပဲ။ အဲဒီပစ္စည်းမျိုးကို ဒါ နတ္ထိပစ္စည်းလို့ မရှိတော့တဲ့ နောက်မှာ ကျေးဇူးပြုတာ။ မရှိခြင်းဖြင့် ကျေးဇူးပြုတာ။ ရှိနေတုန်းမှာ ကျေးဇူးမပြုဘူး။ မရှိတော့မှ ကျေးဇူးပြုတယ်။ ဒီအုပ်စုက ၇ ခုရှိတယ်။

(ဆက်ရန်) 

အပိုင်း (၁) သို့

အပိုင်း (၂) သို့

အပိုင်း (၄) သို့

Typed By: M.N.Pyone

ဆက်လက်ဖတ်ရှုရန်

လက်တွေ့ဘ၀ကို ပဋ္ဌာန်းနည်းဖြင့် လေ့လာသုံးသပ်ခြင်း (၂)

လောဘဖြစ်နေရင်လည်း လောဘနဲ့ အတွေးတွေ၊ လောဘနဲ့ အပြောတွေ၊ လောဘနဲ့ လုပ်ဆောင်ချက်တွေ၊ မောဟဖြစ်နေရင်လည်း ကို့ယို့ကားယားတွေ ဖြစ်နေတယ်၊ မောဟနဲ့ပက်သက်တဲ့ အတွေးတွေ တွေးတယ်၊ ဘယ်အရာမှ မဆုံးဖြတ်နိုင်ဘူး။ တွေဝေနေတယ်၊ ပြောရင်လည်း ကမောက်ကမတွေ ဖြစ်တယ်။ လုပ်ရင်လည်း ကိုးလို့ကန့်လန့်တွေ ဖြစ်ကုန်တယ် မောဟက။

ကောင်းတဲ့ဘက်ကျတော့ အလောဘဆိုတဲ့ သဘာဝ ဟိတ်တရားလေးတစ်ခု ပေါ်လာရင် လှူချင်စိတ်တွေ တန်းချင်စိတ်တွေ ပေါ်လာတယ်။ Generosity ဆိုတာလေးပေါ်လာတာနဲ့ လှူရအုံးမယ်လို့လည်း ပြောတယ်။ လှူဖို့လည်း ကြိုးစားလာတယ်။ မတူဘူး သဘာဝလေးတွေက။ အဒေါသဆိုတဲ့ မေတ္တာသဘာဝ တရားလေး ပေါ်လာပြန်ပြီဆိုရင်လည်း ဘယ်သူ့ကို ကူညီရမတုန်း စိတ်ထဲမှာ။ ပြောရင်လည်း ကြင်ကြင်နာနာ ပြောတယ်။ ကူညီဖို့စကားတွေပြောလာတယ်၊ လုပ်ဆောင်တယ်၊ အားပေးတယ်။ ဟော… အဒေါသရဲ့ သဘော။ အမောဟဆိုတာနဲ့ အသိဉာဏ်ပေါ်လာတဲ့ အခါကျတော့ တွေးလိုက်တာလည်း ကောင်းတာလေးတွေ ချည်းပဲတွေးတယ်။ မှန်မှန်ကန်ကန် တွေးတတ်တယ်။ မှန်မှန်ကန်ကန် စဉ်းစားတတ်တယ်။ လုပ်သင့်တယ် မလုပ်သင့်ဘူးဆိုတာလည်း ဆုံးဆုံးဖြတ်ဖြတ်ရှိတယ်။ တွေဝေပြီးတော့ မနေဘူး။ ပြောတဲ့စကားတွေကလည်း အကျိုးအကြောင်းဆီလျော်တယ်။ လုပ်တာကိုင်တာလည်း အဆင်တပြေရှိတယ်။ အဲဒါဟာ ဟေတုပစ္စည်းပဲ။

ပဋ္ဌာန်းတရားတော်တွေဟာ အားလုံး ဒါလက်တွေ့ဘ၀နဲ့ ယှဉ်စပ်ပြီးတော့ ကြည့်မယ်ဆိုရင် တိုယ့်ရဲ့ ဘ၀မှာ ပဋ္ဌာန်းတရားတော် မြတ်စွာဘုရားရှင်းပြတဲ့အတိုင်း အကြောင်းတရား၊ အကျိုးတရားတွေ ပေါင်းစပ်ယှဉ်တွဲပြီးတော့ ဖြစ်ပေါ်နေစေတာပါလား။ တို့ဟာ အကြောင်းတရားတွေနဲ့ပေါင်းပြီးတော့ အကြောင်းတရားတွေရဲ့  ဖန်တီးမှုကို ခံနေရတာပါလားလို့ ပဋ္ဌာန်းတရားမှာ သဘောပေါက်ရမယ်။ အဲဒီလို သဘောပေါက်သွားတော့ ဘာအကျိုးရှိတုန်းဆိုရင် မကောင်းတဲ့အကြောင်းတွေ လက်မခံနဲ့ပေါ့ဗျာ။ မကောင်းတဲ့အကြောင်းတွေ လက်ခံနေရင် မကောင်းတဲ့ အကျိုးတရားတွေ လာမှာပေါ့။ အဲဒီတော့ လူတိုင်း၊ လူတိုင်းဟာ ကောင်းကျိုး ချမ်းသာချည်းပဲ  လိုချင်ကြတာ ဒါသဘာဝပဲ။ မချမ်းသာချင်ဘူးလား၊ ချမ်းသာချင်တယ်။  ဆင်းရဲဒုက္ခ မရောက်ချင်ဘူး ဘယ်သူမှ။ သုခ၊ ကာမ ချမ်းသာကို လိုလားတယ်။ ဒုက္ခ၊ ပဋိကူလာ ဆင်းရဲမှုကို ရွံရှာ စက်ဆုပ်ကြတယ်။ အဲဒီလိုအနေအထား ရှိလာတဲ့အခါမှာ ချမ်းသာချင်တိုင်း ချမ်းသာတာ မဟုတ်ဘူး။ ချမ်းသာခြင်းရဲ့  အကြောင်းဖြစ်တဲ့ အကြောင်းတရားကို လုပ်ဆောင်မှ ချမ်းသာတာ။ မျိုးစေ့လေးက အပင်ပေါက်စေချင်ရင် ဟေ့ ပေါက်လို့အမိန့်ပေးလို့ မရဘူး။ သူ့ဆိုင်ရာ အကြောင်းနဲ့ ပေါင်းဖက်ပေးရတယ်။ ဘာလုပ်ရတုန်းဆိုရင် မြေကြီးထဲချပြီး ရေလေးလောင်းပြီးတော့ မြေနဲ့ရေနဲ့ ဆုံစည်းပေးရတယ်။ ကိုယ်ကပေါက်ခိုင်း လို့မရဘူး။ အဲဒီတော့ ဘာလုပ်တာတုန်းဆိုရင် Condition လေးတွေနဲ့ ဆုံပေးတာပဲ။ ကိုယ်လုပ်နိုင်တာအဲဒါပဲ။ Condition ကို ဆုံပေးရတယ်။ မြေနဲ့ရေနဲ့ပေါင်းပေးရင် အဲဒီမျိုးစေ့လေးက အပင်ပေါက်လာမှာ သေချာတယ်။  အပင်တော့ ပေါက်စေချင်တယ်။ အဲဒီမျိုးစေ့လေးကို ပုလင်းထဲထည့်ပြီးတော့ သိမ်းထားမယ်ဆိုရင် ပေါက်မလား။ မပေါက်ဘူးနော်။ မြေနဲ့ရေနဲ့ ဝေးဝေးထားရင် မပေါက်ဘူး။ ဘာလို့တုန်းဆိုရင် Condition မှမရှိတာ။

အဲဒီတော့ အပင်ဆိုတဲ့ အကျိုးကို ရချင်ရင် အဲဒီအပင်ကို ဖြစ်အောင်လုပ်တဲ့ အကြောင်းတရားနဲ့ ဆုံစည်းပေး ရတယ်။ လူကလုပ်နိုင်တာ ဒါဘဲ။ သူ့ဆိုင်ရာအကြောင်းကို လုပ်ပေးရတယ်။ ဟော လုပ်ပေးတဲ့အခါမှာ သစ်ပင်လေးက ပေါက်လာတယ်။ ပေါက်လာရင်လည်း ထိုသစ်ပင်လေး ရှင်သန်ဖို့အတွက် ဆန့်ကျင်ဘက် အကြောင်းတရားတွေ ဖယ်ရှားပစ်ရမယ်။ အကျိုးပြုတဲ့ အကြောင်းတရားတွေ ပေါင်းစပ်ပေးရမယ်။ မြေသြဇာထည့် ပေးသင့်တဲ့အခါ ထည့်ပေးရမယ်။ Fertilizer လုပ်ပေးရတယ်။ ရေလောင်းပေးရတယ်။ ဟော အကြောင်းတွေ လုပ်ပေးတာ။ ပိုးတွေဘာတွေ ဖယ်ရှားပေးတယ်၊ နေရောင်ခြည်ရတဲ့ နေရာထားပေးတယ်။ ဟော အကြောင်းတရားတွေကို ကိုယ်ကလုပ်ပေးနေတာ။ အကြောင်းတရားတွေ လုပ်ပေးရင် ပန်းပင်လေးဆိုရင် အဲဒီပန်းပင်လေးက အပွင့်တွေပွင့်လို့ လှလှပပဖြစ်လာတယ်။

ထို့အတူဘဲ ကိုယ့်ရဲ့ ဘ၀မှာ ပဋ္ဌာန်းကို သဘောပေါက်သွားရင် ကိုယ့်ရဲ့ ဘ၀မှာ ကောင်းတဲ့ချမ်းသာ သုခကို ဖန်တီးပေးနိုင်တဲ့ အကြောင်းတရားတွေကို ရွေးချယ်ရမယ်။ ဆိုးကျိုးကို ဖန်းတီးပေးနေတဲ့ အကြောင်းတရား တွေကို ဖယ်ရှားရမယ်။ အကြောင်းတရားသည် အမြဲတမ်း နှစ်ခုရှိတယ်။ ကောင်းကျိုးချမ်းသာကို ဖြစ်ပွား စေတတ်တဲ့ အကြောင်းတရားကတစ်မျိုး၊ မကောင်းကျိုး၊ ဆင်းရဲဒုက္ခတွေကို ဖြစ်ပွားစေတတ်တဲ့ အကြောင်းတရားက တစ်မျိုး၊ အဲဒီနှစ်မျိုးထဲမှာ ကိုယ်လုပ်ပေးနိုင်တာ ဘာလဲဆိုရင် ကောင်းတဲ့အကြောင်းတရားတွေကို ရှာကြံပြီးတော့ ဖြည့်တင်းပေးဖို့ပဲ။ အဲဒီလိုဖြည့်တင်းပေးရင် ထိုကောင်းတဲ့အကြောင်းတရား၊ ကောင်းတဲ့ Condition တွေက ကောင်းတဲ့အကျိုးတွေကို သူ့ဖာသာသူ ထုတ်လုပ်သွားမှာပါ။ ကိုယ်လုပ်နိုင်တာ ဒါပါပဲ။ အေး ပဋ္ဌာန်းဆိုတာ အကြောင်းနဲ့ အကျိုး Conditional Relation အကြောင်းအကျိုး ဆက်သွယ်နေတာကို ပြောတာ။

ကဲ ပဋ္ဌာန်းတရားမှာ ဗုဒ္ဓမြတ်စွာက အဓိကဟောတဲ့ အားလုံးသိကြတဲ့၂၄ပစ္စည်းမှာ ပဋ္ဌာန်းတရားတော်မှာ အဓိကအကြောင်းတရားနဲ့ အကျိုးတရား။ အကြောင်းတရားကို ပစ္စယလို့ခေါ်တယ်။ ပစ္စယ - ပစ္စယုပ္ပန္န္န ။ Perceptive of Pattana, Conditional Relation ကိုကြည့်မယ်။

အဲဒီမှာ ပဋ္ဌာန်းတရားရဲ့  Main Point က ဘာတုန်းဆိုရင် တဖက်က ပစ္စယ၊ တဖက်က ပစ္စယုပ္ပန္န္န။ ပစ္စယရဲ့ အဓိပ္ပာယ်က ဘာတုန်းဆိုရင် ဖြစ်စေခြင်းနဲ့ တည်စေခြင်း။ Cause to Arise and Cause to Maintain။ဖြစ်အောင်လုပ်တယ်။ ဖြစ်ပြီးရင်လည်း တည်တံ့စေ တယ်အဲဒါ။ “ဖြစ်စေ၊ တည်စေ ဤနှစ်ထွေ ခေါ်လေ ကျေးဇူးပြု။” မဖြစ်သေးရင် ဖြစ်အောင်လုပ်တဲ့ အကြောင်းတရား၊ ဖြစ်လာပြီးရင်လည်း တည်တံ့စေတဲ့ အကြောင်းတရား အဲဒါကို ပစ္စယ။ ဟေတုပစ္စယေန ပစ္စယော။ ပစ္စယော ပစ္စယောနဲ့ ရွတ်နေတာဟာ အဲဒါ.. အကြောင်း။ ကျေးဇူးပြုတယ်ဆိုတာ လူတွေလည်း တစ်ယောက်ကို တစ်ယောက် ပြောကြတယ်၊ ဟာ သူက ကျေးဇူးပြုလိုက်တာ ဘယ်သူက ကျေးဇူးပြုတယ်နဲ့ ဒီစကားကိုသုံးတယ်။ ပစ္စယဆိုတဲ့ စကားလုံးကို။ အဲဒီတော့ ကျေးဇူးပြုတယ်ဆိုတာ ဘာတုန်းဆိုရင် မဖြစ်သေးတာကို ဖြစ်အောင်လုပ်တယ်၊ ဖြစ်လာပြီးရင် တည်တံ့စေတယ်။ အဲဒါကို ပစ္စယ။ ပစ္စယုပ္ပန္န္န လို့ဆိုတာ ပစ္စယ ဥပ္ပန္န္န။ ပစ္စယဆိုတာ အကြောင်းတရားကြောင့် ဥပ္ပန္န္န္န ဖြစ်ပေါ်လာတာ။ အကြောင်းတရားကြောင့် ဖြစ်ပေါ်လာတဲ့ အကျိုးတရား။ ပြောမယ်ဆိုရင် Cause and Effect ပဲ။ ပစ္စယဆိုတာ Cause၊ ပစ္စယုပ္ပန္န္နဆိုတာ Effect။ အကြောင်းနဲ့ အကျိုး။ အဲဒီအကြောင်းနဲ့အကျိုး နှစ်ခုသည် Mutual Relation။ အဲဒီနှစ်ခုသည် ဆက်စပ်ပြီးတော့ နေတယ်။

ပဋ္ဌာန်းတရားကြီးကို ခြုံငုံကြည့်မယ်ဆိုရင် ပစ္စယပိုင်းမှာ ဘာတွေ ပါလဲဆိုတာကို ကြည့်မယ်။ မြတ်စွာဘုရားက ပဋ္ဌာန်းဟောတာ လူသားတွေတင် မဟုတ်ဘူး။  သက်ရှိသတ္တ၀ါတွေနဲ့ သက်မဲ့တွေအားလုံး Universal Dhamma, Universal Truth , Universal Law of Nature အဲဒါကို ဟောတာဖြစ်တော့ အားလုံးကို Cover ဖြစ်အောင်ဟောထားတာ။ အဲဒီတော့ ပစ္စယဆိုတဲ့ အကြောင်းပိုင်းမှာ ၃မျိုးရှိတယ်ဆိုတာမှတ်။ နံပါတ် (၁) က သင်္ခတ - Sankhata၊ နံပါတ်(၂)က  Asankhata၊ နံပါတ်(၃)က Pannatti။ အဲဒီ ဝေါဟာရလေးတွေက ပါဠိဝေါဟာရလေးတွေ။ ဒါပေမယ့် မြန်မာလူမျိုးတွေရဲ့  အသိဉာဏ်ထဲမှာ ဒီဝေါဟာရလေးတွေရှိတယ်လို့ ထင်ပါတယ်။ သင်္ခတတရား၊ သင်္ခတ၊ အသင်္ခတ၊ ပညတ္တိ။ သင်္ခတဆိုတာ ဘာတုန်း။ သံ ဆိုတာ အကြောင်းတရားတွေ စုပေါင်းပြီး ခတ Created အကြောင်းတရားတွေက ပေါင်းပြီးတော့ ဖန်တီးထားတဲ့အရာလို့ ဒီလိုပြောတာ။

ကဲခုနက သစ်ပင်လေး မျိုးစေ့လေးကို စိုက်လိုက်တဲ့အခါ အပင်လေး ပေါက်လာတယ်။ အဲဒီပေါက်လာတဲ့ အပင်လေးဟာ အကြောင်း ဘယ်နှစ်ခုကနေပြီး ဖန်တီးထားတုန်း။ အကြမ်းအားဖြင့် ကြည့်မယ်ဆိုရင်မျိုးစေ့လေးပါတယ်၊ မြေပါတယ်၊ ရေပါတယ်။ လူရဲ့ လုံ့လ ၀ီရိယ အသာထားလိုက်အုံးနော်။ အနည်းဆုံး ကြည့်မယ်ဆို သုံးခု မရှိဘူးလား။ အဲဒီတော့ မြေပါရမယ်၊ ရေပါရမယ်၊ မျိုးစေ့ပါရမယ်။ မြေကြီးချည်းဆိုလဲ မပေါက်ဘူး။ ရေချည်းဆိုလဲ မပေါက်ဘူး မျိုးစေ့မပါပဲ။ မျိုးစေ့ချည်းဆိုလဲ မပေါက်ဘူး။ မြေရယ် ရေရယ် မျိုးစေ့ရယ် ဟောဒီ သုံးခုပေါင်းလိုက်တဲ့အခါမှာ အညှောင့်လေးထွက်လာတာ၊ အပင်လေး ပေါက်လာတာ။ အဲဒီတော့ ကြည့်လေ မြေဆိုတဲ့ အကြောင်းတရား၊ ရေဆိုတဲ့ အကြောင်းတရား၊ မျိုးစေ့ဆိုတဲ့ အကြောင်းတရား အဲဒီ အကြောင်းတရား သုံးခုသည် ပေါင်းစုပြီးတော့ Harmonious Reward ။ ပေါင်းပြီးတော့ သူတို့လုပ်လိုက်တာ၊ သူတို့ထုတ်လိုက်တာ ဘာထုတ်လိုက်လဲဆိုရင် အပင်လေးထုတ်လိုက်တာ။ အဲဒီ အကြောင်းတရားလေးတွေကို ပစ္စယလို့ခေါ်တယ်။ အဲဒါကို သင်္ခတလို့ခေါ်တယ်။ သင်္ခတဆိုတာ အခုပြောတဲ့ အကြောင်းတရားတွေက ပေါင်းပြီးတော့ ထုတ်လုပ်ထားတာ။ အဲဒီတရားမျိုးတွေကို သင်္ခတ။

ကဲဘုန်းကြီးတို့တတွေကိုလည်းပဲ ခန္ဓာကိုယ်ထဲကို ကြည့်ကြည့်လိုက်။ မျက်စိလေး နှစ်လုံးဖွင့်ပြီးတော့ အိမ်ပေါ်ကနေ ပြတင်းပေါက်ဖွင့် ဟိုဘက် ဒီဘက် ကြည့်လိုက်တဲ့အခါ မြင်စရာအာရုံတွေ မမြင်ဘူးလား။ ကဲ အဲဒီလို မြင်တဲ့အထဲမှာ အကြောင်းတရား အကြမ်းဖျင်းအားဖြင့် စဉ်းစားကြည့်မယ်ဆိုရင် မျက်စိပါလို့ မြင်တာ မဟုတ်လား။ အပြင်ဘက်က မြင်စရာအာရုံတွေရှိလို့ မြင်တာမဟုတ်လား။ သြော် မျက်စိက အကြောင်းတစ်ခု၊ မြင်စရာ အာရုံက အကြောင်း တစ်ခု၊ အဲဒီထဲမှာ မှောင်နေမယ်ဆိုရင် မြင်စရာတွေကို မြင်ရမှာမဟုတ်ဘူး။ အလင်းလေးရဲ့  အကူအညီလည်း ပါသေးတယ်။ အလင်းရောင် လေးက အကြောင်းတစ်ခု။ မိမိရဲ့  သတိထားမှု ဆိုတဲ့ Attention ကအကြောင်းတစ်ခု။ ဘယ်နှစ်ခုဖြစ်သွားတုန်း။ လေးခုဖြစ်သွားတယ်။ အဲဒီလေးခု ပေါင်းလိုက်တော့မှ မြင်တယ်လို့ ပြောရတဲ့ အသိစိတ်လေး ပေါ်လာတာ။ ကြည့်လေ ဒီအသိစိတ်လေးကို  ဟောဒီ အကြောင်းလေးခုက ထုတ်ပေးလိုက်တာ။ အဲဒါကို သံ(San) - အကြောင်းတရားတွေက ပေါင်းပြီးတော့ ခတ(khata) - ဖန်တီးလိုက်တာ။ သင်္ခတ ဆိုတာ အဲဒါကိုပြောတာ။ အကြောင်းတရားတွေက စုပေါင်းပြီးတော့ ပြုလုပ်ထားတဲ့ အရာတဲ့။

ကဲဘုန်းကြီးတို့ ဘ၀ကြီးတစ်ခုလုံးကို ကိုယ့်ရဲ့ လက်တွေ့ဘ၀ကို ပဋ္ဌာန်းနည်းနဲ့ ယှဉ်စပ်ကြည့်မယ်။ ကိုယ့်ဘ၀မှာ ဒီလို ဆိုင်ရာဆိုင်ရာ အကြောင်းတွေက ထုတ်လုပ်ပေးနေတာ နေ့တိုင်းနေ့တိုင်း။ အကြောင်းတရားမပါဘဲနဲ့ လုံးဝ ဘယ်အရာမှမဖြစ်ဘူး။ ကြည့် မျက်စိကမြင်တာလေးပဲ အကြောင်းက။ နားကလည်း ထို့အတူဘဲ။ အသံကြားတယ်ဆိုရင် အသံရှိရတယ်၊ နားရှိရတယ်။ အဲတစ်ခုခု မရှိဘူးဆိုရင် အသံက တိတ်ဆိတ်နေရင် မကြားဘူး။ နားကပင်းနေတယ်၊ ကန်းနေတယ်ဆိုလည်း မကြားရဘူး။ ဆိုင်ရာ ဆိုင်ရာ အကြောင်းတရားတွေက အပြည့်အစုံ ရှိနေရမယ်။ အပြည့်အစုံရှိနေရင် ပြည့်စုံတဲ့ အကျိုးတရားတွေက ၀င်နေမှာပဲ။တခြားစိတ်တွေ စိတ်တွေကလည်း ပဋ္ဌာန်းနည်းနဲ့ နောက်ကျရင် ယှဉ်ပြီးတော့ ကြည့်တဲ့အခါမှာ တွေ့လာမယ်။ အဲဒီတော့ သင်္ခတ ဆိုတဲ့ အဓိပ္ပာယ်က ဒီလို အကြောင်းတရားတွေက စုပြီးတော့ လုပ်ထားတာဆိုတာ ထင်ရှားတယ်။

(ဆက်ရန်) 

အပိုင်း (၁) သို့

အပိုင်း (၃) သို့

အပိုင်း (၄) သို့

Typed By: M.N.Pyone

ဆက်လက်ဖတ်ရှုရန်

လက်တွေ့ဘ၀ကို ပဋ္ဌာန်းနည်းဖြင့် လေ့လာသုံးသပ်ခြင်း (၁)

ပဋ္ဌာန်းဆိုတာက အလွန်ကျယ်ပြန့်ပြီးတော့ ကြီးမားလှတဲ့ အတိုင်းအတာရှိတဲ့ ကျမ်းကြီး တစ်ခုပါ။ ဒီကနေ့ မြန်မာနိုင်ငံမှာ ထိုထိုအရပ်ဒေသမှာ အသံမစဲ ပဋ္ဌာန်းပွဲများကျင်းပပြီးတော့ ပဋ္ဌန်းပါဠိတော်ကြီးတွေကို ရွတ်ဖတ်ပူဇော်နေကြတာ ဖြစ်သောကြောင့် ပဋ္ဌာန်းကျမ်းလာ ပါဠိနဲ့ ပက်သက်ပြီး ကြားဖူးနားဝ ရှိနေကြတယ်။

ပဋ္ဌာန်း ၂၄ ပစ္စည်းဆိုတာကလည်း တော်တော်များများ သိပြီးတော့နေကြတယ်။ ဟေတုပစ္စယော၊ အာရမဏပစ္စယော စသည်ဖြင့် လူတိုင်းလောက်နီးနီး မြန်မာနိုင်ငံမှာ ပဋ္ဌာန်း ၂၄ ပစ္စည်း အကျဉ်းလောက်ကိုတော့ သိနေကြတယ်။ နောက်တဖန် အရပ်ထဲမှာပြောကြတယ်။ တစ်ဦးနဲ့တစ်ဦး အကြောင်းအကျိုး ညီညွတ်လို့ တွေ့ကြုံ ဆက်ဆံကြတဲ့အခါမှာ ပဋ္ဌာန်းဆက်၊ ပဋ္ဌာန်းဆက်နဲ့ ဘယ်သူကစသုံးတယ် မသိဘူး။ အဲဒီစကားလည်း ပြောလေ့ ရှိကြတယ်။

ပဋ္ဌာနဆိုတဲ့ ပဋ္ဌာန်းနဲ့ပက်သက်ပြီးတော့ ဘုန်းကြီးတို့ဗုဒ္ဓဘာသာဝင် သူတော်စင်တွေ မြန်မာပြည်က အင်မတန်မှ ရင်းနှီးတယ်ဆိုတာ သိသာတယ်။ သို့သော်ပဋ္ဌာန်းတရားဟာ ဘာကိုအဓိကထားဟောနေသလဲလို့ ဆိုတာကိုတော့ သတိပြုမိမှ ပြုမိပါလိမ့်မယ်။ စာအုပ်ထဲက ပဋ္ဌာန်းကိုတော့ အင်မတန်မှ ကြီးမားတယ် ကျယ်ပြန့်တယ်လို့ဆိုပြီး ဘုန်းကြီးတို့ တတွေဟာ စာအုပ်ထဲက ပဋ္ဌာန်းကိုရည်ညွန်းပြီးတော့ ပြောနေကြတာများတယ်။ ဒီကနေ့ ခန္ဓာကိုယ်ထဲမှာရှိတဲ့ ပဋ္ဌာန်း တွေ့အောင်ရှာဖို့လိုပါတယ်။

လက်တွေ့ဘ၀ကို ပဋ္ဌာန်းနည်းဖြင့် လေ့လာသုံးသပ်ခြင်းလို့ဆိုတော့  တကယ်စင်စစ် မြတ်စွာဘုရားဟောထားတဲ့ ပဋ္ဌာနလို့ခေါ်တဲ့ Conditional Relation  အကြောင်းတရားနဲ့ အကျိုးတရား တစ်ခုနဲ့ တစ်ခု ဆက်သွယ်ပြီးတော့ ဖြစ်ပေါ်နေတယ်ဆိုတာ လူသားတွေနဲ့ ပက်ဝန်းကျင်ကို ပြောတာပါ။ ဘုန်းကြီးတို့ဘ၀မှာ ရရှိထားတဲ့ ခန္ဓာ ၊ ရုပ်ခန္ဓာနဲ့ နာမ်ခန္ဓာ သို့မဟုတ် ခန္ဓာငါးပါး။ ထိုခန္ဓာငါးပါးဟာ အကြောင်းနဲ့အကျိုးနဲ့ အပြန်အလှန်ဆက်သွယ်ြပီးတော့ တည်ရှိနေတယ်ဆိုတာကို ဘုန်းကြီးတို့ သဘောပေါက်ဖို့ပါ။

ဘယ်လိုဆက်သွယ်နေတယ်ဆိုတာ ပဋ္ဌာန်းကျမ်းကြီးရဲ့  နည်းစနစ်နဲ့ တစ်ခုချင်း တစ်ခုချင်း ပြောမယ်ဆိုရင် အချိန်ပေါင်း တော်တော်ကြာကြာ ရက်ပေါင်း တော်တော်ကြာကြာ ပဋ္ဌာန်းအကြောင်း ဟောရပြောရ ရှင်းရမှာပါ။ သို့သော် ပဋ္ဌာန်းရဲ့  သဘာဝ၊ ပဋ္ဌာန်းဆိုတာ မိမိတို့ဘ၀မှာ ဘယ်လို ဆက်စပ်နေတယ်ဆိုတဲ့ Perspective Viewကိုတော့ ဒီကနေ့ သဘောပေါက်သွားဖို့ ဘုန်းကြီးတို့ လမ်းညွှန်နိုင်လိမ့်မယ်လို့ ယုံကြည်ပါတယ်။

ပင်လယ်မမြင်ဘူးတဲ့ ပုဂ္ဂိုလ်တွေကို ပင်လယ်ကမ်းစပ်ခေါ်သွားပြီး ပင်လယ်ဆိုတာ ဒါပဲဟေ့၊ ကမ်းမမြင် လမ်းမမြင် အင်မတန်မှ ကျယ်ဝန်းပြီးတော့ အန်မတန်မှ နက်ရှိုင်းတဲ့ ရေပြင်ကြီးကိုခေါ်တာလို့ ပင်လယ်ပြင်ကြီးကို လက်ညှိုးထိုးပြလို့ ကြည့်လိုက်ရတဲ့ ပုဂ္ဂိုလ်တွေက မင်းတို့ပင်လယ်ဆိုတာ သိပြီလားလို့ဆိုရင် သိပါပြီ။ မြင်ဖူးပြီလားဆိုရင် မြင်ဖူးပါတယ် ဒီလိုပဲ ပြောကြမှာပါ။ ဒီကနေ့လည်း ကမ်းစပ်ကရပ်ပြီးတော့ ပင်လယ်ပြင်ကြီးကို လက်ညှိုးညွှန်လိုက်သလို ပဋ္ဌာန်းရဲ့ သဘာဝ အကြောင်းတရားတွေ မိမိတို့ရဲ့ ခန္ဓာကိုယ်မှာ၊ မိမိတုိ့ရဲ့ ဘ၀မှာ ဆက်စပ်ဖြစ်ပေါ်နေပုံကို ညွှန်ပြပါ့မယ်။

ဘုန်းကြီးတို့ ဒီလူ့လောက  မွေးလာတာကိုက ပဋ္ဌာနလို့ဆိုတဲ့ အကြောင်းအကျိုးတွေ ဆက်စပ်ပြီးတော့ မွေးလာတာ။ ဘ၀မှာရှင်သန်နေတော့လည်းပဲ အကြောင်းအကျိုးတွေ ဆက်စပ်ပြီးတော့ ရှင်သန်နေကြတာ။ နောက်ဆုံးဘ၀ နိဂုံးချုပ်သွားတဲ့အခါမှာလည်းပဲ ဟောဒီအကြောင်းအကျိုးတွေ ဆက်စပ်ရှင်သန်ပြီးတော့နေအုံးမှာ။ သံသရာထဲက မထွက်သေးသမျှ ကာလပတ်လုံး အကြောင်းနဲ့အကျိုးနဲ့ ဆက်နွယ်ပြီးတော့ ဘုန်းကြီးတို့ဘ၀ဟာ မွေးဖွားလိုက်၊ အိုမင်းသွားလိုက်၊ သေဆုံးသွားလိုက်၊ ထပ်မံမွေးဖွာလာလိုက်၊ အိုမင်းသွားလိုက် သေဆုံးသွားလိုက်နဲ့ ဒီလို ဘ၀သံသရာ စက်ရဟတ်ကြီးထဲမှာ အဆက်မပြတ် လည်ပတ်သွားလာနေရတာဟာ ဘယ်လို အခြေအနေတွေနဲ့ ရပ်တည်ပြီးတော့ လည်ပတ်သွားလာနေတာလဲ။ အကြောင်းတရားက ဘာလဲ။ ဘာကိုမှီတည်ပြီးတော့ ဒီလိုဖြစ်နေတာလဲလို့ဆိုတာဟာ ပဋ္ဌာန်းကို သဘောပေါက်ရင် ဘယ်အကြောင်းကြောင့် တို့တတွေဟာ  ဒီလို လည်ပတ်သွားလာနေရတယ်ဆိုတာ သဘောပေါက်မှာပါ။

ဗုဒ္ဓမြတ်စွာရဲ့  ပဋ္ဌာန်းတရားကို မသိတဲ့ ပုဂ္ဂိုလ်ကျတော့ တို့တတွေ ဘ၀သံသရာထဲ လည်ပတ်သွားလာနေရတာ သို့မဟုတ် လူ့ဘ၀ရလာတာဟာ တန်ခိုးရှင်တစ်ယောက်ကဖန်ဆင်းလို့ဆိုတဲ့ အတွေးတွေဝင်လာတယ်။ အဲဒီ တန်ခိုးရှင်ဆိုတဲ့ အတွေးဟာ တကယ်စစ်မှန်တဲ့ အကြောင်းတရားကို မဖော်ထုတ်နိုင်လို့ မမြင်နိုင်တဲ့ အရာတစ်ခုကို လက်ညှိုးညွှန်ပြခြင်းသာ ဖြစ်ပါတယ်။ လောကမှာ မြန်မာပြည်မှာ ခေါ်တဲ့ အခေါ်အဝေါ်လေးတွေ ရှိတယ်။ နတ်ရေတွင်းဆိုတဲ့ စကားလေး။ တူးတဲ့လူမရှိပဲနဲ့ သဘာဝ ဖြစ်နေတဲ့ ရေတွင်းကို နတ်ရေတွင်းလို့ ခေါ်တယ်။ တစုံတယောက်က တူးထားတာမဟုတ်ဘူး။ တူးတဲ့လူရှာမရလို့ နတ်ရေတွင်း နတ်တူးတာလို့ ဒီလိုခေါ်တဲ့သဘော။ အဲဒီသဘောက ပတ္တမြားထွက်တဲ့ မိုးကုတ်ရောက်သွားလို့ရှိရင် မိုးကုတ်ကလူတွေ ခေါ်တဲ့ ဝေါဟာရ တစ်ခုနဲ့ နှိုင်းယှဉ်ကြည့်ရင် ပေါ်လာလိမ့်မယ်။ မိုးကုတ်က လူတွေက ကျောက်တူးတဲ့ အခါမှာ အဲဒီတူးတဲ့ကျောက်တွေထဲမှာ လေးဖက်လေးတန်ချောပြီးတော့ သဘာဝကိုက လူလုပ်ထားသလိုပဲ ကျောက်ပွင့်ကလေးတွေ တခါတရံ ပါလာတတ်တယ်။ အဲဒီကျောက်ပွင့်လေးတွေကို နတ်သွေးလို့ခေါ်တယ် သူတို့က။ သွေးတဲ့လူမရှိဘူး။ မသိဘူးလေ။ တွင်းထွက်ကိုက အဲဒီလိုလေးဘက်ဒေါင့်ကလေးတွေ ပီပီပြင်ပြင်သွေးထားတဲ့ ကျောက်ကို နတ်သွေးလို့ခေါ်တယ်။ ဘာဖြစ်လို့ နတ်သွေးလို့ခေါ်တာတုန်း။ သွေးတဲ့လူရှာ မတွေ့လို့ပြောတာ။ သူ့မှာတော့ သူ့ဆိုင်ရာ ဆိုင်ရာ အကြောင်းရှိမှာပေါ့။ အဲဒီလိုပဲ လောက ကအကြောင်းရှာမရရင်  နတ်ကိုသွားပြီ ညွှန်းတတ်တယ်ဆိုတဲ့ သဘောကိုပြောတာပါ။

ဒီကနေ့ ဗုဒ္ဓမြတ်စွာက ပဋ္ဌာန်းတရားတော်မှာ အကြောင်းတရားတွေကို ရှာပြထားတယ်။ အဲဒီအကြောင်းတရားတွေကို သိလို့ရှိရင် မဆီဆိုင်တဲ့ ၀ိသမဟေတုဆိုတဲ့ မမှန်ကန်တဲ့ အကြောင်းတရားတွေ၊ အကြောင်းမဲ့ဖြစ်ပါတယ်ဆိုတဲ့အဟေတုက အကြောင်းကို လက်မခံတဲ့ အယူဝါဒတွေ မှားယွင်းတဲ့ အယူအဆတွေကို ဖယ်ရှားပစ်နိုင်မှာ ဖြစ်ပါတယ်။ မှန်ကန်တဲ့ အယူအဆ တစ်ရပ်ကို ဖော်ထုတ်နိုင်မှာဖြစ်တယ်။ ဒါကြောင့် ပဋ္ဌာန်းတရားတော်ကို လေ့လာသင်ယူရတယ်ဆိုတာ မိမိဘ၀ကို မိမိဘ၀ခရီးကို ကောင်းကောင်းနားလည်ပြီးတော့ ဘ၀လမ်းကြောင်း ဖြောင့်ဖြောင့်တန်းတန်းနဲ့ လျှောက်လှမ်းပြီး ဘ၀ခရီး အဆုံးသတ်တဲ့နည်း ဘ၀နိရောဓ ဘယ်လိုရှာရမယ်ဆိုတဲ့ စနစ်တွေပါ ဟောဒီ ပဋ္ဌာန်းကျမ်းကြီးကို လေ့လာလိုက်လို့ရှိရင် အစစ်အမှန် အကြောင်းအရာတွေကို တွေ့ရှိသွားမှာ ဖြစ်ပါတယ်။

ဗုဒ္ဓမြတ်စွာက အကြောင်းတရားတွေကို ဖော်ပြဖို့အတွက် ၂၄ မျိုးသော စွမ်းရည်သတ္တိ၊ ၂၄ ပစ္စည်းကို ဖော်ထုတ်ထားပါတယ်။ ၂၄နာရီ ဘုန်းကြီးတို့ အသက်ရှင် နေကြတဲ့ တနေ့တာမှာ ၂၄နာရီမှာ ၂၄ပစ္စည်းဆိုတဲ့ အကြောင်းတရားတွေနဲ့ ရပ်တည်ပြီး အသက်ရှင်နေကြတာနော်။ ၂၄နာရီမှာ ၂၄ မျိုးသော ပစ္စည်းတွေ သတ္တိလို့ဆိုတာ Energy  သဘာဝတရားတွေမှာ ဆိုင်ရာဆိုင်ရာ စွမ်းအားလေးတွေ၊ စွမ်းအင်လေးတွေ ရှိတယ်။ အဲဒီစွမ်းအင်လေးတွေ တစ်ခုနဲ့တစ်ခု ပေါင်းလိုက်တဲ့အခါ စွမ်းအားလို့ဆိုတဲ့ Force တွေဖြစ်လာတယ်။ Energy တွေကနေပြီးတော့ Force ဖြစ်လာတယ်။ ၂၄ပစ္စည်းဆိုတဲ့ စွမ်းအင်တွေက အကြောင်းတရားနဲ့ အကျိုးတရား နှစ်ခုပေါင်းစပ်လိုက်တဲ့အခါ စွမ်းအားဖြစ်လာပြီးတော့ ဘ၀တစ်ခု ဖန်တီးပြီးတော့ လှုပ်ရှားလာတာ ဖြစ်ပါတယ်။

ပဋ္ဌာန်းတရားရဲ့  အနေအထားကို ဘ၀နဲ့ လေ့လာကြည့်ရအောင်။ ထင်ရှားတာလေး တစ်ခုနဲ့ ပြောပြမယ်။ ဟေတုပစ္စည်းလို့ ဆိုပါစို့ ။ ဟေတုပစ္စယော။ ဟေတုဆိုတာ ဘာကိုပြောတာတုန်းဆိုရင် လူသားတွေရဲ့  စိတ်သန္တန်ထဲမှာ နှစ်သက်စရာ မြတ်နိုးစရာ အာရုံလေးကိုတွေ့တဲ့အခါမှာ လိုချင်တယ်၊ ကြိုက်တယ်ဆိုတဲ့ သဘောလေး ပေါ်လာတယ်။ အဲဒီလိုချင်မှု၊ တွယ်တာမှု ဆိုတဲ့ သဘောလေးကို အဘိဓမ္မာ ဝေါဟာရက လောဘလို့ခေါ်တယ်။ ဒါလေးပေါ်တာလာတယ်။ ကိုယ်မနှစ်မြို့ တဲ့ အာရုံနဲ့ ဆုံတဲ့အခါကျတော့ မကြိုက်ဘူး။ မုန်းတယ်ဆိုတဲ့ သဘောလေးပေါ်လာတယ်။ အကြောင်းအရာ တစ်ခုကို ဆင်ခြင်စဉ်းစားလို့ လက်လှမ်းမမှီတဲ့ အခါ တွေဝေတယ်ဆိုတဲ့ အမှန်တရားကို အမှန်အတိုင်း မသိဘူး၊ ဘာလုပ်ရမယ် ဘာကိုင်ရမယ်ဆိုတာ မသိဘူး။ ဘယ်လိုဆုံးဖြတ်ရမှန်းမသိဘူး  ဆိုတဲ့ တွေဝေတဲ့ သဘောလေးပေါ်လာတယ်။ မုန်းတီးတယ်ဆိုတဲ့ သဘောလေးကို ဒေါသလို့ခေါ်တယ်။ တွေဝေတယ်ဆိုတဲ့ သဘောလေးကို မောဟလို့ခေါ်တယ်။

ကဲ ပဋ္ဌာန်းတရားတော်အရ ပြောမယ်ဆိုရင် အားလုံး လက်တွေ့ ကိုယ်တွေ့ကြုံဖူးကြလိမ့်မယ်။ တစုံတခုကို အလိုမကျလို့ ဒေါသဖြစ်နေတယ်ဆိုပါစို့။ ဒေါသဆိုတဲ့ သဘာဝတရားလေး မိမိစိတ်ထဲမှာ ပေါ်လာတယ်။ အလိုမကျ ဒေါသဖြစ်နေတဲ့ အချိန်မှာ ကိုယ့်ကိုကိုယ် ဆန်းစစ်ကြည့်။ ဘာတွေတွေးနေတုန်း။ အတွေးပိုင်းကို စဉ်းစားကြည့်လိုက်မယ်ဆိုရင် မုန်းတီးတဲ့ အတွေးတွေပဲ တွေးနေတယ်။ မကျေနပ်တဲ့ အတွေးတွေပဲ တွေးတယ်။ မကျေနပ်စရာတွေတွေးတယ်၊ မုန်းစရာတွေတွေးတယ်၊ အလိုမကျမယ့် ကိစ္စတွေတွေးတယ်။ တွေးလေ တွေးလေ ပေါ်လာသမျှတွေကလည်း အလိုမကျမှုတွေ ပံ့ပိုးနေသလိုဖြစ်နေတယ်။ ကဲ အဲဒီကိစ္စမှာ ပဋ္ဌာန်းက မြတ်စွာဘုရားက ဘယ်လိုဟောတုန်းဆိုရင် ဒေါသဆိုတဲ့ ခုနက အမုန်းတရားလေး မိမိသန္တန်မှာပေါ်လာရင် အဲဒီဒေါသလေးဟာ ရေသောက်မြစ်လိုဖြစ်သွားတယ်။ အဲဒီဒေါသဆိုတဲ့ အမုန်းတရားလေးသည် မုန်းတီးရွံ့ရှာတဲ့ အတွေးတွေကို ဆက်လက်ဖြစ်ပေါ်စေနေတယ်။ သစ်ပင်မှာ သစ်မြစ်က အပွင့်တွေ အသီးတွေ အရွက်တွေ အကိုင်းတွေ အခက်တွေကို စည်ပင်ရှင်သန်နေအောင် အမြစ်က ထောက်ပံ့နေသလို အမုန်းတရားလေးက မုန်းတဲ့ အတွေးတွေကို တွေးနေစေတယ်တဲ့။ အမုန်းတရားလေး မကင်းမခြင်း ဒေါသဆိုတဲ့ အမုန်းတရားလေး မကင်းမခြင်း မုန်းတီးတဲ့ အတွေးတွေဟာ ပျောက်မသွားဘူး။ အဲဒါကို ပဋ္ဌာန်းပါဠိတော်မှာ ဟေတူ ဟေတု သမ္ပယုတ္တကာနံ ဓမ္မာနံဒီလိုဟောတာ။ ဟေတူ ဟိတ်ခြောက်ပါး ပစ္စည်းတရားတို့သည် ဟေတု သမ္ပယုတ္တကာနံ ဟိတ်နှင့်ယှဉ်သော စိတ်စေတသိတ်တရားတို့အားလို့ဆိုတော့ စိတ်ထဲက အတွေးတွေဟာ အရပ်လိုပြောရင်တော့ အတွေးတွေပေါ့ စာပေလိုပြောရင်တော့ စိတ်နှင့်ယှဉ်ဖက်သဘာဝ သဘောတရားတွေပေါ့။ ဒေါသလေးတွေကို အကြောင်းပြုပြီးတော့ မုန်းတီးတဲ့အတွေးတွေဟာ ဒေါသရှိနေသေးသမျှကာလပတ်လုံး မုန်းတီးတဲ့အတွေးတွေဟာ ရှင်သန်နေမယ်။ ဒေါသလေးသည် မုန်းတီးတဲ့ အတွေးတွေကို Fortifying လုပ်ထားတယ်။ ခိုင်မြဲနေအောင်လုပ်ထားတယ် ရှင်သန်နေအောင်လုပ်ထားတယ်။

ဒါတင်လားလို့ဆိုတော့ မကသေးဘူး။ တံသမုဋ္ဌာနာနဉ္စ ရူပါနံ ဆိုတော့ ပြောပြီဆိုတဲ့အချိန်ကျတော့ ချိုချိုသာသာ မပြောဘူး။ ဒေါသရှိနေတဲ့ ပုဂ္ဂိုလ်က အနည်းဆုံး မာဆတ်ဆတ်ပြောတယ်။ တိုတိုတောင်းတောင်း ပြောတယ်။ စကားကို တိုတိုပြတ်ပြတ်ပြောတယ်။ ကြင်နာတဲ့ စကားမျိုးကိုမပြောဘူး။ ရိုင်းရိုင်းပျပျပြောတယ်။ အဲဒီအပြောတွေဟာ တံသမုဋ္ဌာနာနဉ္စ ရူပါနံ ခုနက အမုန်းတရား လွှမ်းမိုးထားတဲ့ စိတ်ကထုတ်လုပ်လိုက်တဲ့ ပစ္စည်းပဲ။ အဲဒါကို စာပေကျတော့ စိတ္တဇရုပ်လို့ပြောတာပေ့ါဗျာ။ ဝေါဟာရလေးတွေတင်ပဲ ကွဲသွားတာ။ ကဲဒါတင်လားဆိုတော့ မဟုတ်သေးဘူး။ ကာယကံမြောက် တစ်ခုခု လုပ်တဲ့အခါမှာလည်းပဲ စိတ်ဆိုးနေတဲ့ ပုဂ္ဂိုလ်တစ်ယောက်သည် လမ်းလျှောက်နေတာတောင်မှ ဆောင့်ဆောင့်အောင့်အောင့်နဲ့ သွားမယ်။ ငြင်ငြင်သာသာ မသွားဘူး။ တစုံတခုကို ကိုင်တဲ့ တွယ်တဲ့အခါမှာလည်းပဲ ကြမ်းကြမ်းတမ်းတမ်း ဆောင့်ဆောင့်အောင့်အောင့် လုပ်လေ့ရှိတယ်။ တံခါးပိတ်တာက အစ၊ ဒေါသထွက်နေရင် တံခါးပိတ်တာကအစ လမ်းလျှောက်တာက အစ ဆောင့်ဆောင့်အောင့်အောင့် ပြင်းပြင်းထန်ထန် လုပ်လာတယ်။ အဲဒီလို ကိုယ်ရဲ့ အမူအယာ Physical Actionတွေကြမ်းတမ်းလာတာဟာ ဘယ်သူ့ကြောင့်တုန်းဆိုရင် ဟောဒီ ဒေါသလေးကြောင့်။ ဒေါသလေး မပြေမချင်း ဒီအမူအယာတွေ မပြေဘူး။ အဲဒါကို ဟေတုပစ္စည်းနဲ့ ထောက်ပံ့ထားတယ်လို့ ပြောတာ။ ပဋ္ဌာန်းက။

အဲတော့ နေ့စဉ်ဘ၀မှာ အကြောင်းတရားက ရှိနေတာ။ နှလုံးသားထဲမှာ ဒေါသ၀င်လာလိုက်တာနဲ့ တပြိုင်တည်း မုန်းတီးတဲ့ အတွေးတွေက အဆက်မပြတ်ပေါ်နေတယ်၊ တိုတိုပြတ်ပြတ်နဲ့ ရိုင်းပြတဲ့  စကားပြောချင်တယ်၊ ပြောတာတွေဖြစ်ပေါ်လာတယ်။ ရိုင်းပြတဲ့ အမူအယာနဲ့ ပြုလုပ်တာ၊ ဆောင့်ဆောင့်အောင့်အောင့် ပြုလုပ်တယ်ဆိုတဲ့ အမူအယာတွေ ပေါ်လာတယ်။ ဘယ်သူကဒါတွေကို ဆက်လက်ဖြစ်ပေါ်စေသလဲဆိုရင် ဒေါသဆိုတဲ့တရားက ဆက်လက်ဖြစ်ပေါ်နေစေတာ။ ဒါကြောင့် ဒေါသကို မြတ်စွာဘုရားက ဟေတုပစ္စယောလို့ ဟောတာပါ။ ဟေတုဆိုတဲ့ အကြောင်းတရားတဲ့။ သစ်မြစ်လိုပဲတဲ့။ အမြစ်ရှိနေသေးသမျှ အဲဒီအပင်ဟာ ရှင်သန်နေအုံးမှာပဲ။ အပွင့်ပွင့်တဲ့ အချိန်ကျပွင့်မယ်၊ သီးတဲ့ အချိန်ကျ သီးလာမယ်။ ဒီအမြစ်မပြတ်သေးသမျှ ဒါတွေ ဆက်လက်ဖြစ်နေမယ်လို့ ဒီလိုဟောတာ။ အဲဒါကို ပဋ္ဌန်းပါဠိတော်မှာ ဟေတူ ဟေတု သမ္ပယုတ္တကာနံ ဓမ္မာနံ တံသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ ဟေတူ လောဘ၊ဒေါသ၊ မောဟ၊ အလောဘ၊ အဒေါသ၊ အမောဟ ဆိုတဲ့ဟေတုအမည်ရတဲ့ သဘာဝတရားတွေဟာ ဟေတုသမ္ပယုတ္တကာနုံ ထိုဟိတ်နှင့်ယှဉ်ပြီးတော့ ဖြစ်ပေါ်လာတဲ့ စိတ်စေသတိတ်လို့ဆိုတဲ့ သဘာဝတရားတွေ တံသမုဋ္ဌာနာနဉ္စ ရူုပါနံ ထိုဟိတ်နှင့်ယှဉ်တဲ့ သဘာဝတရားတွေနဲ့ ဆက်စပ်ဖြစ်ပေါ်နေုတဲ့ စိတ္တဇရုပ်ဆိုတဲ့ ပြောဆိုမှုတွေ လုပ်ရှားမှုတွေ ဒီရုပ်တရားတွေကို ဟေတုပစ္စယေနဟေတုပစ္စယသတ္တိဖြင့် ပစ္စယော ဥပက္ကာရကော ကျေးဇူးပြုကာ ထောက်ပံ့ထားသည် ဟောတိဖြစ်၏။Maintaining လုပ်ထားတာ ၊ Fortifying လုပ်ထားတာ။

ကဲ ဒေါသလေးလည်း ပြေသွားရော ခုနကဟာတွေ ရှိသေးလား။ မရှိတော့ဘူး။ လူတွေက ဖြစ်လာပြီ အဲဒီကျတော့ I am so sorry, I apologize ဖြစ်လာပြီ။ ခုနတုန်းကတော့ ပြောချင်ရာပြောတယ် ဒေါသရှိတုန်းကတော့ ပြောချင်ရာပြော ဆိုချင်ရာဆိုပြီးတော့ နောက်ကျတော့ I am so sorry ဖြစ်သွားပြီ။ ဘာဖြစ်လို့ ဒေါသလေး ပြေသွားတာနဲ့ ခုနဟာတွေ တစ်ခုမှ မရှိတော့ဘူး။ မုန်းတဲ့အတွေးတွေ ပျောက်သွားပြီ အိုခွင့်လွတ်လို့ အကြင်နာတွေ ဖြစ်ကုန်ပြီ်။ ပြောတဲ့အခါမှာလည်း အကြင်အနာ စကားတွေပြော ချိုချိုသာသာတွေ ဖြစ်လာပြီ။ ပိုပြီးတော့ စိတ်ဆိုးပြီး စိတ်ပြေသွားရင် ပိုကြင်နာတယ် လူတွေက။ သွားတဲ့လာတဲ့အခါမှာလည်း ခုနလို ဆောင့်ဆောင့်အောင့်အောင့် မဟုတ်တော့ဘူး။ အဲဒီသဘောတွေကို မြတ်စွာဘုရားက ပဋ္ဌာန်းမှာဟောတာပါ။ ဒါလက်တွေ့ဘ၀မှာ ပဋ္ဌာန်းနည်းနဲ့အရ ရှုလို့ရတယ်။ ထို့အတူပဲ ဒါနမူနာလေးအနေနဲ့ ဘုန်းကြီးတို့ကြည့်ရမယ်။ 

(ဆက်ရန်)

အပိုင်း (၂) သို့ 

အပိုင်း (၃) သို့ 

အပိုင်း (၄) သို့ 

Typed By: M.N.Pyone

အပိုင်း (၁) 



အပိုင်း (၂) 

ဆက်လက်ဖတ်ရှုရန်